Po'unde-unde 69 - Wunta Mempori

Pekakai a laro pompema'isoa

¹ Tiano petewawado anu mpenani. Montonda nanino Sisi Bonse. Inso ndi Daudi.

² Ikadudui akumo, oo Ue Ala, hangano uwoi mewuatakoomo hawe a we'uku!

³ Tondu aku a laro epe anu ondalo, nahina petadaa; tedonta akumo a laro uwoi a laro uwoi anu ondalo, ka mansolono mowo molomo aku.

⁴ Telusa aku hangano meboo-booli, motu'i burokoku; mataku mooro hangano merorohi Ira Ue Alaku.

⁵ Mia anu me'o'aliaakune nahina pu'uno hadioopo sekono wuu a uluku; hadio ntu'u anu mingki mpepate aku, ondae onaemo iwaliku anu inehedo mpegaupi. Hapa anu nahi kurontuo, asalakonoke aku mokuleo?

⁶ Oo Ue Ala, Omiu tumo'orio benge-bengeku, luwuno salaku nahi tewuni ndi Omiu.

⁷ Si po'inee ira mia anu sumikori Komiu pinokoko'ii hangano ongkue, oo Ue, Ue Alano luwuakoano! Si po'inee ira mia anu umungke Komiu kona mokoko'iia hangano ongkue, oo Ue Alado to Isaraeli!

⁸ Nde hangano Omiumo kutembio mokoko'ii, mokoko'iia kuwowawao.

⁹ Gagi akumo mia susua a mpe'etuku, mia hawe luwuno anado ineku;

¹⁰ hangano mawongkono kumekewoio raha-Miu mokomo'ai aku, ka pontatado mia tumatako-Miu umalu aku.

¹¹ Mengese aku ka puasa, sine maupo atuu mowawaakune tataaku;

¹² kupokonao sawu kampili gagi sangkaku, sine ongkue gagi pasinggirido.

¹³ Ndi ondae anu mpentoro a mpewowa langkai gagi aku wua wiwi ka penani pasinggirido anu memolangu.

¹⁴ Sine ongkue, mekakai aku ndi Omiu, oo Ue, i tempo Ipemoikoo, oo Ue Ala; a pompehohawa-Miu anu langkai Isangkiakunemo pontulungi-Miu anu nahi otu-otu!

¹⁵ Ipotola akumo inso a laro rege, kasi kutondu, po'ineeomo kupinotola inso ndi ondae anu umo'aliaakune, ka inso a uwoi anu ondalo!

¹⁶ Si po'ineeo uwoi moowo molomo aku, ke ondaloano tahi malua tumele aku, ka si po'ineeo sumuru mekomu umuko aku.

¹⁷ Isangki akumo, oo Ue, hangano hadio ntu'u pompehohawaMiu nahi otu-otu, Ipewolilimo ndi ongkue montonda langkaino pompehohawa-Miu!

¹⁸ Siimo Iwunio rupa-Miu inso a ntetenaa-Miu, hangano mompema'iso aku; rongamo Isangki aku!

¹⁹ Aiwamo ndi ongkue, Itolosi akumo, hangano luwuno iwaliku Ipotola akumo.

²⁰ Omiu tumo'orio tataaku, mokoko'ii ka mokoko'iiaku; luwuno iwaliku kongko i aro-Miu.

²¹ Rosoku ipuduomo pontataa atuu, tedoa aku molema; monsikori aku mia anu metonda mompemasusa, sine nahina, sumikori ira anu mpontarero, sine nahi kupohawe.

²² Tendeano, domempakaakune rasu, ka i tempono kumokoranga, dompopo'inuakune anggoro mo'olo.

²³ Po'ineeomo kaanga pinatinda i arodo gagi oho, ka porame-rameado gagi pompete'umala.

²⁴ Po'ineeomo matado gagi wongi-wongi, ranta nahi dompongkita; weweuomo tongado wela telusa!

²⁵ I'uwuomo mosa'ono aroa-Miu ndi ondae, ka po'ineeomo tekuda-Miu anu tensila umalu ira.

²⁶ Po'ineeomo pekemaado gagi boni-boni, ka po'ineeomo luwuno kemado nahina mo'iangario.

²⁷ Hangano domelampuio mia anu tinunduhi-Miu, domentiangio pompemahakido mia anu tinobo-Miu.

²⁸ Itiangiomo sala a nsala poweweudo, ka si mansa Ipokomentee ira!

²⁹ Po'ineeomo domempinahihi inso a wunta tuwua, siimo domebinuri mperonga-ronga saru mia mentee!

³⁰ Sine ongkue andio tepokonsii ka mompemahaki, pontulungi-Miu, oo Ue Ala, po'ineeomo tumande aku!

³¹ Aku umunde-undeakono penani nee-Do Ue Ala, melangkaiako Ira penani po'unde-unde;

³² hangano mongkona atuu Dopemoikoopo i Ue sekonopo sapi lakino, sekonopo ana nsapi lakino anu metandu ka mekuku tebansi.

³³ Po'ineeomo ikitao mia anu me'urumako ka ipo'unde; omiu anu umungke Ira Ue Ala, po'ineeomo ka iwali moroso aroamiu!

³⁴ Hangano mia mongkokolaro Doperorongeakono i Ue, ka nahi Dopekodeio mia-Do anu tinawa.

³⁵ Po'ineeomo langi ka tolino, tahi malua ka luwuno anu melelu i larono, umunde-unde Ira.

³⁶ Hangano Ondae Ue Ala Ira kumaduduio Sioni ka wali wangu ira kotano Yehuda, ka dompo'ia tetenaa-Do i ra'ai ka mpe'ueo;

³⁷ ana'uedo ta me'ueo, ka ondae anu kumekewoio nee-Do ira mpo'ia mpiha i tu'ai.