Po'unde-unde 68 - Wunta Mempori

Marambano poponangi-Do Ue Ala 68:1-36

¹ Tiano petewawado anu mpenani. Penani po'unde-undeno i Daudi. Penani.

² Mentade Ira Ue Ala, ka ntesiarawo iramo iwali-Do, luwuno mia anu umo'aliaako Ira mpolai inso i aro-Do.

³ Kana moliuno ahu, kanatuumo Ipokomoliu ira kana lonono gomo umpeda a api, kanatuumo domemate mia mosa'o gaudo i aro-Do Ue Ala.

⁴ Sine mia mentee memawongko, ondae mengkokora-kora mpo'unde i aro-Do Ue Ala, mpo'unde ka memawongko.

⁵ Penanimo tia-Do Ue Ala, penanimo umunde-undeo nee-Do, pelangkai Iramo anu me'ula a nseru! Nee-Do onaemo i Ue; mawongkomo i aro-Do!

⁶ Ondae Ue Ala a mpo'ianga-Do anu mempori onaemo Amado nana'ote nahina amado ka Puu Mpo'alaakodo tuwu beine,

⁷ Ondae Ue Ala moweeako ira po'iangado anu ntesosaelo, Dopotola ira anu mentinaha, onaemo ka dompo'unde, sine anu me'ewa pino'inee mpo'ia a wita anu londa.

⁸ Oo Ue Ala, tempono Ilako metea i arodo bawaa-Miu, tempono Ipelempa a mpada malua, Sela

⁹ tolino leelu ka langi mo'uwu usa i aro-Do Ue Ala i Sinai, i aro-Do Ue Ala, Ue Alado to Isaraeli.

¹⁰ Usa anu hadio ntu'u I'uwuo, oo Ue Ala; Ipokomoikoo wita-Miu anu mokari atuu,

¹¹ onaemo ka dompo'ia mpiha binawaa-Miu i ra'ai; a laro moiko-Miu Ipokosompoo kineredo mia anu tepokonsii, oo Ue Ala.

¹² Ondae i Ue mompowee pau; langkai pebaresido beine mpowawa lele moiko,

¹³ ”Luwuno mokole ka sorodadudo mpolai, mpolai ira, ka beine i raha mpetia-tia pinomuru.

¹⁴ Tembio ka ibutu mpepombole i olodo raha bimba, hei marapati saru pani metongoako salaka, saru wulu mpanino tesosangkilo kana wulaa?”

¹⁵ Tempono Anu Tedoa Pabawa sumiarawo ira mokole i ra'ai, metiiomo seru baku a wawo Ntorukuno Salomoni.

¹⁶ Torukuno ondau ntu'u, mentorukuno Basani atuu, mentorukuno anu mepunsu hadio, mentorukuno Basani atuu!

¹⁷ Hei luwuno torukuno anu mepunsu hadio, tembio ka impesili mata mosiri, a ntorukuno anu inehe-Do Ue Ala gagi mpentoroa-Do? Menteeano, Ondae i Ue Ira mo'ia mpiha i ra'ai!

¹⁸ Luwuno kareta-Do Ue Ala mopulu nsowu, tendeano mapasowu-sowu hadiono; Ondae i Ue hawe Iramo inso i Sinai, mewinso a mpo'ianga mempori!

¹⁹ Mewuatako Komiumo a mantandeano, saru wawa ira tinawa; Itarimaomo luwuno pesomba inso a mia, maupo inso ndi ondae anu me'ewa hangano Ondae Ue Ala mo'ia i ra'ai.

²⁰ Inunde-unde Iramo i Ue! Oleo me'eu oleo Dotembiakita tinembito; Ondaemo Ue Ala tekaduduiato. Sela

²¹ Ndi ontae Ondae Ue Ala atuu onaemo Ue Ala anu mongkadudui, butu ndi Ondae Ue Ala, Ueto, hinao pesalaa meluarako inso a matea.

²² Menteeano, Ondae Ue Ala Ira piregoo uludo luwuno iwali-Do, banga uluno mia mewuu mokapa anu tuwu mpiha a laro hala.

²³ Ondae i Ue mepau Iramo, ”Inso i Basani Aku umala ira, Aku umala ira maupo inso a ntahi anu ondalo,

²⁴ ka uwo'ohio karumu a laro reado iwalimu, ka elodo dahumu mpohawe mbo'u tiado.”

²⁵ Mia mengkitao maramba-Miu, oo Ue Ala, maramba-Do Ue Alaku, Mokoleku, a laro po'ianga mempori.

²⁶ I arono mpelempa luwuno anu mpenani, i bungkuno luwuno anu mpemaeako katapi, i tongano luwuno ana beine anu mpotingko rebana,

²⁷ ”Unde-unde Iramo Ue Ala a laro luwuno bawaa, unde-unde Iramo i Ue, hei omiu anu nte'inso a mpepu'uano Isaraeli!”

²⁸ I tu'ai kongko i Benami, anu tompa susu, anu wawa ira, luwuno pinemota'uno i Yehuda ntehuhu, luwuno pinemota'uno i Sebulo, luwuno pinemota'uno i Napatali.

²⁹ Ipumpuomo roso-Miu, oo Ue Ala, pokorosoomo, oo Ue Ala, hapa anu Iweweuakamimo.

³⁰ Hangano raha-Miu i Yerusale, luwuno mokole mpohaweo pesomba ndi Omiu.

³¹ Wurarai iramo kondehora mo'ila a ntonga gelaga, bawaano bante saru sapi lakinodo luwuno tongku! Landa iramo anu mpo'ungke salaka; siarawo iramo tongku anu inehedo mpetea.

³² Inso i Masiri mia mewawa ira sangka mala, Etiopia ronga tumandeo kaeno ndi Ondae Ue Ala.

³³ Hei luwuno poparentaa ntolino, penanimo tia-Do Ue Ala, penanimo unde-unde Ira i Ue; Sela

³⁴ tia-Do anu hinao pe'ulaa-Do telaloio langi tempo se'eluno. Pekokoongakonomo, Ondae moporongeo suara-Do, suara-Do anu mongkokongiri!

³⁵ Mangakuakonomo pabawa-Do Ue Ala; maramba-Do kongko i wawono Isaraeli, pabawa-Do humaweo luwuno seru.

³⁶ Ondae Ue Ala tedoa mongkokongiri inso a laro po'ianga mempori-Do; Ondaemo Ue Alado to Isaraeli, Ondae moweeako ira pabawa ka roso a bawaa-Do. Inunde-unde Iramo Ue Ala.