Po'unde-unde 66 - Wunta Mempori

Po'undeakono wineweu-Do Ue Ala anu mongkokongiri 66:1-20

¹ Tiano petewawado anu mpenani. Penani Po'unde-unde. Kokora-koramo po'undeako Ira Ue Ala, hei luwuno ihino tolino,

² penanimo unde-undeo marambano nee-Do, pelangkaiako Iramo po'unde-unde!

³ Pepaumo ndi Ondae Ue Ala, ”Tedoa mongkokongiri luwuno wineweu-Miu; hangano pabawa-Miu anu tedoa langkai luwuno iwali-Miu mpetuundu ndi Omiu.

⁴ Luwuno ihino tolino mpenggolontu mpesombai Komiu, ka mpenani umunde-unde Komiu, menani umunde-undeo nee-Miu.” Sela

⁵ Lakomo ka kitaomo wineweu-Do Ue Ala; Ondae mongkokongiri a laro wineweu-Do a mia:

⁶ Dobalio tahi gagi wita motu'i, ka ondae mensakio korono saru mpelempa karu. Onaemo pu'uno aiwamo tomemawongko hangano Ondae,

⁷ anu moparentaako roso ka mosia anu nahina tampulaano. Mata-Do moposooo luwuno tongku, ka si dompompelangka-langkai anu me'ewa. Sela

⁸ Unde-unde Iramo Ue Alamami, hei luwuno tongku, ka impoporongeako Iramo po'unde-unde!

⁹ Ondae weweu kami kongko mentuwu ka nahi po'ineeo karumami telelu.

¹⁰ Hangano I'arahako kamimo, oo Ue Ala, mokomorina kamimo, kana mia mompokomorina salaka.

¹¹ Iwinso kamimo a laro buani, mompokona tembia a ntongamami;

¹² Ipo'inee iramo mia ntelaloio ulumami, mpolalo kamimo api ka uwoi; sine Iluarako kamimo ka mompowee koloaa.

¹³ Aku mewinso a laro raha-Miu saru mowawa pesomba tinunu, aku umowahio pontangaku ndi Omiu,

¹⁴ anu ipauomo wiwiku, ka pinauno ngangaku i tempono kumasusa.

¹⁵ Luwuno pesomba tinunu inso a kondehora mewalo ta pinesombaako ndi Omiu, saru ahuno pesomba inso a bimba lakino; aku patinda ira sapi ka bembe lakino. Sela

¹⁶ Aiwamo, rongeomo, hei luwumiu anu doitoako Ira Ue Ala, aku tumutuluo hapa anu wineweu-Do a ngkoroiku.

¹⁷ Ndi Ondae mebooli akumo saru ngangaku, kanandioandio saru eloku kupenaniako po'unde-unde.

¹⁸ Ande-andeno hinao tinoo mosa'o i laro aroaku, manasa Ondae i Ue nahi Dobehe rumongeo.

¹⁹ Sine Ondae Ue Ala mentee ntu'u Dorongeomo, Doperioomo pekakai anu pinauku.

²⁰ Inunde-unde Iramo Ue Ala, anu tumarimao pekakaiku ka nahi poko'olaio pompehohawa-Do inso ndi ongkue.