Po'unde-unde 65 - Wunta Mempori

Mpo'unde-unde hangano Ondae i Ue mokomewaloo wita 65:1-14

¹ Tiano petewawado anu mpenani. Penani po'unde-undeno i Daudi. Penani.

² Pototono tia-Miumo po'unde-unde, oo Ue Ala i Sioni. Ndi Omiumo mia mpo'owahi tinanga,

³ hei Omiu anu merorongeakono pekakai. Ndi Omiumo luwuno mia dome'aiwa mpe'aro

⁴ hangano mensala. Luwuno halamami lumaloio rosomami, sine Omiumo anu pahihio.

⁵ Me'uraomo mia anu biniki-Miu ka wawao umpeda ndi Omiu; onae ta mo'ia a kintala-Miu. Po'ineeomo kimegagi mowohiako luwuno anu moiko a raha-Miu, a raha-Miu anu mempori.

⁶ Saru luwuno wineweu anu mongkokongiri ka saru moleoa Isangki kami, oo Ue Ala anu kumadudui kami, Omiumo pine'ala-alano luwuno tompano tolino ka luwuno tahi malua anu olai;

⁷ Omiumo anu montadeakono roso-Miu luwuno torukuno, ka tonga-Miu mesulepeako roso;

⁸ Omiumo anu mokotemontoo u'uruno tahi malua, u'uruno luwuno bombano ka tewukano luwuno tongku!

⁹ Ka mia anu mpo'ia a luwuno tompano tolino ntengiriakono luwuno petondoni-Miu anu kinohali-haliako; pesabaakoano mo'oru ka telalono tekamburi. Iweweuo kokora-kora mo'unde.

¹⁰ Ipepenteeo wita atuu ka Ipokogagio mewalo, ka mokokaeaakono hasili anu hadio ntu'u. Korono-Do Ue Ala bukeako uwoi; Ipatindaako ira gandu. Oo, kanatuumo Ipatindao wita atuu:

¹¹ I'uwoio pesalaano padekono, Ipokotengawuo witano mpebatu-batu, saru usa marombo Ipokomewaloakono; Ironsoo luwuno pinopahono.

¹² Ta'u Iramba-rambaakono moiko-Miu, hanga-Miu mokomewaloo wita;

¹³ wita pompakambia i pada one molowulu, luwuno pongku mpesulepeako kokora-kora mo'unde;

¹⁴ luwuno ewo pada mpesangkaako bawaano bembe bimba, luwuno lembono mpetutuwiako gandu, luwuno mengkokora-kora mpo'unde ka mpenani-nani.