Po'unde-unde 63 - Wunta Mempori

Kumekewoi Ira Ue Ala

¹ Penani po'unde-undeno i Daudi, tempono onae kongko i pada one Yehuda.

² Oo Ue Ala, Omiumo Ue Alaku, mo'o-mo'oru ku'ungke Komiu, sumangaku mokoranga ndi Omiu, koroiku mokendo kumekewoi Komiu, kana wita anu motu'i ka mokoranga, nahi me'uwoi.

³ Kanatuumo kupo'aroo mataku ndi Omiu a mpo'ianga mempori, ka kukitao roso-Miu ka maramba-Miu.

⁴ Hangano pompehohawa-Miu moikoopo sekono tuwu; wiwiku ta melangkai Komiu.

⁵ Kanatuumo aku umunde-unde Komiu asa ntinuwuku ka pauo nee-Miu saru kae tetande.

⁶ Sumangaku kana pinokomowohiako untolaa anu mo'ahi ntu'u, ka saru wiwi anu kokorakora mo'unde ngangaku menaniako po'unde-unde.

⁷ Tempono kurambe Komiu a mpoturiaku, kupo'ia mewowolo Komiu asa mpodagaia wongi;

⁸ hangano gagi Komiumo tumulungi aku, ka i totono pe'egoano pani-Miu kukokora-kora mo'unde.

⁹ Sumangaku metako ndi Omiu, kae ngkoana-Miu tumumbo aku.

¹⁰ Sine mia anu mpontoo momporaakono penaaku, ira mpewinso a mpo'iangado mia mate.

¹¹ Ira mempineweengako a mata mponai, ira megagi kaangado dahu a ntobu.

¹² Sine mokole ta mawongko aroano ndi Ondae Ue Ala; sompo mia anu mesumpa a nee-Do, ta mo'unde, hangano ngangado mia anu mpompau pegaupi ta inonso.