Po'unde-unde 62 - Wunta Mempori

Rodo butu umpeda ndi Ondae Ue Ala 62:1-13

¹ Tiano petewawado anu mpenani. Montonda Yedutuni. Penani po'unde-undeno i Daudi.

² Butu koa umpeda ndi Ondae Ue Ala kurodo, insomo ndi Ondae tekaduduiku.

³ Butu koa Ondae torukuno watuku ka tekaduduiaku, kota benteku, nahi aku hori telelu.

⁴ Opiapo mbo'u tehineno luwumiu mingki mensapoio asa mia, tendeano mingki mensolangio, kana a rere anu tengkoo, a rere watu anu ta tebangku?

⁵ Mentee ntu'u, mpotoo ira mpepasiakono inso a mpentoroano anu mantande, ondae anu inehedo mpegaupi; saru ngangado domporonso, sine i laro aroado mpontotonaa ira. Sela

⁶ Penoro-noro i aro-Do koa Ue Ala, hei sumangaku, hangano insomo ndi Ondae pomperorohiaku!

⁷ Butu koa Ondae torukuno watuku ka tekaduduiaku, kota benteku, nahi aku telelu.

⁸ Ndi Ondae Ue Ala po'iangano tekaduduiaku ka marambaku; torukuno watu rosoku, pepekaduduiaku ndi Ondae Ue Ala.

⁹ Pe'ala-ala Iramo sompo tempo, hei bawaa, pauomo ihino aroamu i aro-Do; Ondaemo Ue Ala pepekaduduiato. Sela

¹⁰ Butu koa angi luwuno mia anu pinokongkurama, butu pegaupido mpena mia anu maramba. Tewala tinimba, ondae ntetande kontahane, mperonga-ronga ira mbo'u monongkoopo sekono angi.

¹¹ Si mpompe'ala-ala a pompokonsiia, si pomperorohi anu nahina tuduno a rinontu; tewala arataa koteti-tetiangino, si petako aroamu ndi onae.

¹² Asa rupa Dopauo Ue Ala, orua rupa kurongeo: nine roso kongko ndi Ondae Ue Ala,

¹³ ka ndi Omiu, oo Ue, hinao pompehohawa; Omiu sumuloo sompo mia montonda wineweuno.