Po'unde-unde 60 - Wunta Mempori

Pekakai mo'ema ponangia 60:1-14

¹ Tiano petewawado anu mpenani. Montonda nanino Sisi Bonse Ponsakosii. Mikitami inso ndi Daudi ka ipinaguruako,

² tempono ipeteaako ira to Arami-Mesopotamia ka to Arami-Soba, ka tempono i Yoabi mansano mekule numangi iramo hopulu ka orua nsowu to Edomi i Lembono Mopa'i.

³ Oo Ue Ala, Itadi kamimo ka I'alu kami; tekuda Komiumo; Ipomule kamimo!

⁴ Iwembuomo tolino ka bansio witano; Ipomuleomo tebobokano, hangano tolino melelu.

⁵ Iweweu iramo bawaa-Miu mpompebasai marasaia anu mobea, Ipoweeakamimo mpo'inu anggoro anu mompokomokolili.

⁶ Sine ndi ondae anu medoito ndi Omiu Ipoweeako iramo petondoni, ka dompolai inso a mpana. Sela

⁷ Ikaduduiakamimo kae ngkoana-Miu ka Isangki kamimo, ka domentolamo mia anu kinekewoi-Miu.

⁸ Ondae Ue Ala mepau Iramo a mpo'ianga mempori-Do, ”Saru pohio mpetea Aku tumia-tiao Sikemi, ka lembono Sukoti Aku sumongkao.

⁹ Ongkuemo me'ueo Gileadi, Ongkuemo me'ueo Manase, Eparai onaemo pe'engoiano ulu-Ku, Yehuda onaemo tuko poparentaa-Ku;

¹⁰ Moabi onaemo pewo'ohia-Ku, ndi Edomi kupetadiakono solopi-Ku, hangano Pelisitea Kukokora-kora mo'unde.”

¹¹ Isemake anu ta wawa aku a ngkota anu mebente? Isemake anu tumaate aku lumako i Edomi?

¹² Kombake Omiu, oo Ue Ala, anu tumadi kamimo? Omiu nahi lako, oo Ue Ala, meronga-ronga bawaano sorodadumami.

¹³ Ipoweeakamimo pepetulungi mo'aropi iwali, hangano nahina pengkonaano pongkadudui inso a mia.

¹⁴ Saru Ondae Ue Ala tomeweweuo luwuno wineweu moroso ka mosia, hangano Ondae isa'a Ira lumolandao luwuno iwalito.