Po'unde-unde 59 - Wunta Mempori

Mo'ema pontulungi mo'ewai iwali 59:1-18

¹ Tiano petewawado anu mpenani. Montonda nanino Si Poropu. Mikitami inso ndi Daudi, tempono i Saulu montena mia mepenteeo rahano ka ipepateo.

² Ipotola akumo inso a iwaliku, oo Ue Ala; Ibente akumo te'aro a luwuno mia anu mpentade umewai aku

³ Ipotola akumo inso a mia anu mpoweweu mosa'o ka Ikadudui akumo inso a puu mpo'uwu rea.

⁴ Hangano kitaomo domentowokio penaaku; mia memoroso mpedandi ira mpoweweu mosa'o ndi ongkue, kahinaano nahi kupoweweu polimpaia, nahi kutehala, oo Ue,

⁵ nahina salaku, sine mpotuturako ira ka mpepatinda mpesapoi. Aiwamo ndi ongkue ka Ikitaomo!

⁶ Omiu, Ue, Ue Alano luwuakoano, onaemo Ue Alano Isaraeli. Ipewangumo humukuo luwuno tongku; siimo domempinehohawa anu mpoweweu mosa'o saru mpehapu! Sela

⁷ I tempono tekamburi wali ira mehawe, mentumoo ira kana dahu ka melimbuo kota.

⁸ Kitaomo, ondae melaba mpauako ngangado; ponai kongko a wiwido, dompewowoloo, ”Isemake anu rumongeo?”

⁹ Sine Omiu, Ue, mengingisii ira, Ipasinggiri ira luwuno tongku.

¹⁰ Oo rosoku, aku me'ini ndi Omiu, hangano Omiu, oo Ue Ala, onaemo kota benteku.

¹¹ Ondae Ue Alaku Ira tumotowoakune pompehohawa-Do; Ondae Ue Ala Ira weweu aku me'uru-uru ira iwaliku.

¹² Si pepate ira, ka si domengkolupeo tongkuku, Isaariako iramo pabawa-Miu ngkoraane ngkoramai, ka Idontai iramo, oo Ue, kantamami!

¹³ Hangano halano ngangado onaemo pinauno wiwido, po'ineeomo domengkona rako a laro pompelangka-langkaido. Hangano pontotonaa ka pegaupi anu pinaudo,

¹⁴ pingko iramo a laro bamburu, pingko iramo, ranta nami domehina mbo'u, ka domento'orio nine Ondae Ue Ala moparenta i olodo inuleno i Yako, hawe i tompano tolino. Sela

¹⁵ I tempono tekamburi mehawe ira mbo'u, mentumoo ira kana dahu ka melimbuo kota.

¹⁶ Ondae mpelakopi mpo'ungke mpongkaa; tewala nahi domemowohi, mentumoo ira.

¹⁷ Sine aku menaniako roso-Miu, i tempono mo'oru aku kokora-kora mo'unde hangano pompehohawa-Miu; hangano gagi Komiumo kota benteku, polaiaku i tempono kupompema'iso.

¹⁸ Oo rosoku, aku menani umunde-unde Komiu; hangano Ondae Ue Ala onaemo kota benteku, Ondae Ue Ala anu mehohawa aku.