Po'unde-unde 56 - Wunta Mempori

Pompe'ala-ala ndi Ondae Ue Ala a laro masusaa 56:1-14

¹ Tiano petewawado anu mpenani. Montonda nanino Marapati a Ngkeu Tarabanti anu Olai. Mikitami inso ndi Daudi, tempono domerakoo to Pelisiti i Gati.

² Ipehohawa akumo, oo Ue Ala, hangano domelolanda aku mia, hawe sumoo oleo mia mpesapoi ka mpokonsii aku!

³ Iwaliku melulu aku hawe sumoo oleo, oo, hadio mia anu saru mpompelangka-langkai sumapoi aku.

⁴ Tempono kudoito, kupe'ala-ala Komiu;

⁵ ndi Ondae Ue Ala, anu pau-Do ku'unde-undeo, ndi Ondae Ue Ala kupompe'ala-ala, nahi kudoito. Hapake anu pinokoweweuno mia ndi ongkue?

⁶ Hawe sumoo oleo dompoposule-suleo luwuno pauku; mpotoo anu mosa'o ndi ongkue.

⁷ Ondae mpedandi mpoweweu mosa'o ka mpesapoi, dompekokoongakono pelempaku, kana mia anu momporaakono penaaku.

⁸ Kana'umpe ka dompokotola? Ipokompetuundu iramo tongku andio a laro tekuda-Miu, oo Ue Ala!

⁹ Marasaiku Iburiomo, uwoi mataku Inaao a laro ngkadu-kadu-Miu. Kombake luwuno teburi a laro wunta-Miu?

¹⁰ Ka iwaliku ta mosuka i tempono kupebooli; kupe'ala-alao nine Ondae Ue Ala me'alaako ndi ongkue.

¹¹ Ndi Ondae Ue Ala anu pau-Do ku'unde-undeo, ndi Ondae i Ue anu pau-Do ku'unde-undeo,

¹² ndi Ondae Ue Ala kupompe'ala-ala, nahi kudoito. Hapake anu pinokoweweuno mia ndi ongkue?

¹³ Pontangaku ndi Omiu, oo Ue Ala, tumanggo aku, aku umihiiakono pesomba po'unde-unde.

¹⁴ Hangano Ipotola akumo inso a matea, tamoako dumagaio karuku ranta nahi tetidu; onaemo ka imoiko kupelempa i aro-Do Ue Ala a laro wantano tuwua.