Po'unde-unde 55 - Wunta Mempori

Pekakai mo'ema pontulungi te'aro a iwali 55:1-24

¹ Tiano petewawado anu mpenani. Saru pemaeno katapi. Penani pompaguruno i Daudi.

² Ta'oomo biri-Miu, oo Ue Ala, a mpekakaiku, siimo Ipewuni te'aro a mpo'emaku!

³ Iperio akumo ka Isangki akumo! Nahi kurodo a laro pompemasusaku,

⁴ doito aku hangano peboolido iwali, hangano magagano mia mosa'o gaudo; hangano dome'aluakune marasaia, ka saru bamburudo dompe'iwaliakune.

⁵ Huleku mondende, i'alu akumo mongkokongirino matea.

⁶ Ongkue doito ka mondindi-ndidi, mongkokongiria lumimbu aku.

⁷ Onaemo ka kupotae, ”Ande-andeno kupinoweeako pani kana marapatii, aku menee ka mo'ungke po'ianga anu nahina monsosanggoli,

⁸ tendeano aku molai te'ola-olai ka merato i pada one. Sela

⁹ Aku ronga mo'ungke pelingoaku te'aro a opue ka angi mokora.”

¹⁰ Bansiomo elodo ka perawo-rawo iramo, oo Ue, hangano kukitao pobobarasaia ka pe'u'uaa i laro kota!

¹¹ Meene wongi domelimbuo kota atuu a wawo luwuno rere watuno, lambaha me'a'e;

¹² oo, ponsolangia gagi i larono, pompopo'oo ka pompokonsiia nahi hori bintao tanalapano kota.

¹³ Bakanaano iwali anu tumetewehi aku, da kupokotembio; tewala anu umo'aliaakune anu mompelangka-langkai ndi ongkue, da kupokompewuniakono.

¹⁴ Sine omue mia anu mengkena saru ongkue, wali-waliku ka mia pine'ala-alaku:

¹⁵ tedoa tekosi i ndi'ipua to mesambe'e, mewinso a raha-Do Ue Ala a ntongano maroaa.

¹⁶ Po'ineeomo matea sumapoi ira, po'ineeomo dompetii kotuwu-tuwu a laro tolinodo mia mate! Hangano mosa'oa kongko a mpo'iangado, oo i laro aroado.

¹⁷ Sine aku mebooli ndi Ondae Ue Ala, ka Ondae i Ue Ira kumadudui aku.

¹⁸ I tempono ngkiniwia, mo'oru, ka ntonga oleo me'anaiki aku ka mompemahaki ka Dorongeo suaraku.

¹⁹ Dopotola aku saru teliahako inso a mposapoi ndi ongkue, hangano mpetumonda dome'ewai aku.

²⁰ Ondae Ue Ala anu mo'ia mompu'u tempo i ndi'ipua, Ira rumonge aku ka me'uru-uru ira. Hangano nahi dobehe mebalio tuwudo ka nahi domedoitoako Ira Ue Ala. Sela

²¹ Wali-wali atuu tumandeo kaeno te'aro ndi ondae anu tuwu manangai saru onae, ka lumimpaio dandino;

²² ngangano moloreopo sekono mantega, sine onae montoo mesapoi; pepauno molusaopo sekono lana, sine menteeano ponai binuta.

²³ Peweengakonomo danggaramu ndi Ondae i Ue, ka Ira mekariako! Nahi Dopo'ineeo mia mentee telelu.

²⁴ Omiu, oo Ue Ala, Komiu dumontaio mia lambaha a aano sumuru anu ondalo; anu mo'uwu rea ka anu mompopo'oo nahi ta haweako entonga tinuwuno. Sine ongkue andio, kongko mompe'ala-ala ndi Omiu.