Po'unde-unde 51 - Wunta Mempori

Mangakuakono hala 51:1-21

¹ Tiano petewawado anu mpenani. Penani po'unde-undeno i Daudi,

² tempono Nabi Nata aiwa ndi onae umarino mewowaliakono i Batiseba.

³ Ipehohawa Akumo, oo Ue Ala, montonda pompehohawa-Miu, Ipahihiomo halaku montonda pompehohawa-Miu anu langkai!

⁴ Ipokomorina akumo luwu inso a nsalaku, ka inso a halaku Ipokomempori akumo!

⁵ Hangano kupokonto'orio polimpa'iku, wela aku masusaakono halaku.

⁶ Ndi Omiu, butu koa ndi Omiu kutehala ka weweuo hapa anu pinemosa'o-Miu. Ka mentee Komiu a laro pomputusi-Miu, morina a laro mpobitaraa-Miu

⁷ Menteeano, a laro sala mpoweweu kupine'anaako, a laro hala domentiaakune ineku.

⁸ Menteeano, Omiu memoikoo moleo aroa, ka nahi teto'ori Omiu pauakune ponto'ori anu mentee.

⁹ Saru hisopi Ipokomorina akumo inso a halaku, ka kugagi mempori, Iwo'ohi akumo, ka kugagi mopute sekonopo seru baku!

¹⁰ Po'ineeomo kurongeo po'undea ka mawongko, po'ineeomo luwuno wuku anu pinuro-Miu wali mengkokora-kora mawongko!

¹¹ Iwuniomo rupa-Miu inso a halaku, Ipahihiomo luwuno salaku!

¹² Ipokogagiomo aroa anu molino ndi ongkue, oo Ue Ala, ka Ipokowo'ohuakonomo penaa anu moroso laro aroaku!

¹³ Siimo Itadi aku inso i Aro-Miu, ka siimo I'alao penaa-Miu anu mempori inso ndi ongkue!

¹⁴ Ipokuleakunemo mawongkoa hangano pongkadudui-Miu, ka Itumboakunemo penaa anu moroso!

¹⁵ Ka aku paguruako ira pesalaa-Miu a mia anu mpoweweu polimpaia, ka dompepokule ndi Omiu mia mentehala.

¹⁶ Ipotola akumo inso a mpasua rea, oo Ue Ala, Ue Ala tekaduduiaku, ka eloku ta kokora-kora mawongko paleleo moleo-Miu!

¹⁷ Oo Ue, I'ungkahiomo wiwiku, ka ipaleleo ngangaku po'unde-unde ndi Omiu!

¹⁸ Hangano Omiu nahi pemoikoo pesomba sinumbele; ba kupesombaakono pesomba tinunu, nahi Ipebeheo.

¹⁹ Pesomba sinumbele ndi Ondae Ue Ala onaemo sumanga anu mopemasusa; aroa anu tedoa mopemasusa ka buke pe'o'ole nahi Komiu mokoburuakono, oo Ue Ala.

²⁰ Ipopokitaomo moikoa ndi Sioni montonda po'eheno aroa-Miu Iwangu iramo rere watuno Yerusale!

²¹ Ka Komiu memoikoo pesomba anu pototono, pesomba tinunu ka pesomba anu tetunu luwuno; sapi lakino ta pinesombaako a wawo meda pontunua pesomba ndi Omiu.