Po'unde-unde 50 - Wunta Mempori

Pesomba anu mentee ntu'u 50:1-23

¹ Penani po'unde-undeno i Asapi. Anu Tedoa Pabawa, Ondae Ue Ala, mepau ka moboio tolino, inso i sabaano oleo hawe a nsumooano.

² Inso i Sioni, tompaano tekosi, Ondae Ue Ala meposaba mewanta.

³ Ondae Ue Alato hawe ka nahi Ira mo'ia-ia, i aro-Do api mensila'e, angi mokora anu mongkokongiri mepuuri lumimbu Ira.

⁴ Ondae mebooliakono langi i wawono, ka a ntolino Ira bitarao bawaa-Do,

⁵ ”Wawa iramo ramai mia anu pinehohawa-Ku, anu mowutu pedandia saru Ongkue me'empehiako pesomba sinumbele!”

⁶ Langi paleleo moleo-Do, hangano Ondaemo isa'a Ue Ala Puu mpobitara. Sela

⁷ ”Rongeomo, hei bawaa-Ku, Aku mepau, hei Isaraeli, Aku mesakosii umewaikomiu: Ongkuemo Ue Ala, Ue Alamu!

⁸ Komba hangano pesomba sinumbelemu ka Kukuahakomu; kombake pesomba tinunumu wela pinesombaako i aro-Ku?

⁹ Siimo Kupo'ala sapi inso i rahamu ke bembe lakino inso a wala mpinotuwumu,

¹⁰ hangano Ongkuemo me'ueo luwuno kondehora a ntobu, ka sowu-sowuno pinotuwu a ntorukuno.

¹¹ Kuto'orio luwuno manu-manu i laro meene, ka hapa anu melelu a mpada Ongkue me'ueo.

¹² Tewala mokoninggo Aku, nahi paraluu Kupauakomu, hangano Ongkuemo me'ueo tolino ka luwuno ihino.

¹³ Bauno sapi lakinoke Kupongkaa, ke reano bimba lakinoke Kupo'inu?

¹⁴ Pesombaakonomo pesomba po'ude-unde ndi ondae Ue Ala ka owahiomo tinangamu ndi ondae Anu Tedoa Mantande!

¹⁵ Peboolimo ndi Ongkue i tempono ma'isoa, Aku motolako, ka omue ko'umunde-unde Aku.” Sela

¹⁶ Sine a mia mosa'o gauno Ondae Ue Ala mepau, ”Hapake orusuamu paresao pompakosi-Ku, ka ngangamu wela pauo pedandia-Ku,

¹⁷ kahinaano omue umo'aliaakono pongkuahako, ka nahi uperioo pau-Ku?

¹⁸ Tewala omue mongkita anu monako, omue mewali-waliakono, ka mebawaa saru mia monsosabo.

¹⁹ Ngangamu upo'ineeo mompau anu mosa'o, ka a elomu metako pompopo'oo.

²⁰ Omue mentoro ka mepaukiakono pepaekompomu, mosebeo anano inemu.

²¹ Onaemo anu wineweumu, sine Ongkue mo'ia-ia; potaemu nine Ongkue andio mengkena kana omue. Kanandio-andio Aku mesakosii umewaiko ka wawao kara-kara andio i aromu.

²² Pekokoongakonomo andio, hei omiu anu kumolupe Ira Ue Ala; ka si Kupomperangkami, ka nahina anu motolao.

²³ Isema anu mompesombaako pesomba po'unde-unde, onae umunde-unde Aku; mia anu mentee pesalaano, Aku mopokitaakono tekaduduia inso ndi Ondae Ue Ala.”