Po'unde-unde 5 - Wunta Mempori

Pekakai tempono mo'oru 5:1-13

¹ Tiano petewawado anu mpenani. Saru pemaeno siloli. Penani po'unde-undeno i Daudi.

² Irongeomo pinauku, oo Ue, Iperioomo pompemasusaku.

³ Irongeomo peraaliku mepetulungi, oo Mokoleku ka Ue Alaku, hangano ndi Omiumo kupekakai.

⁴ Ue, i tempono mo'oru Irongeo suaraku, itempono mo'oru kuwileo ihino aroaku ndi Omiu, ka kupesisikori.

⁵ Hangano Omiu komba Ue Ala anu memoikoo gau anu mosa'o; mia mosa'o wineweuno nahi ta merato ndi Omiu.

⁶ Anu laba mpau nahi tangka i aro-Miu; I'o'aliaakono luwuno mia anu moweweu mosa'o.

⁷ Ipepate ira luwu mia anu mpegaupi Ondae i Ue mokoburu-Do mongkita anu mo'uwu rea ka anu mompopo'oo.

⁸ Sine ongkue, hangano pompehohawa-Miu anu langkai, mewinso aku a laro raha-Miu, menggolontu mesomba te'aro a raha-Miu anu mempori saru melangkai Komiu.

⁹ Ue, Itaate akumo a laro moleoa-Miu hangano iwaliku; Ipokomereteomo pesalaa-Miu i aroku.

¹⁰ Hangano paudo nahina anu pine'ala-ala, laro aroado buke anu mosa'o, burokodo kana kaburu menganga, elodo buke pe'akala.

¹¹ Po'ineeomo domentembio salado, oo Ue Ala, po'ineeomo dontedonta hangano sinongkado ondaedo; Itadi iramo hangano hadiono halado, hangano ondae me'ewa ndi omiu.

¹² Po'ineeomo luwuno mia anu mepekadudui ndi Omiu memawongko, po'ineeomo domengkokora-kora memawongko ranta nahina tampulaano. Po'ineeomo Ikongkomi ira, ranta anu mehohawao nee-Miu mawongko hangano Omiu.

¹³ Hangano Omiu rumonsoo mia anu mentee, oo Ue; Omiu kumaduduiako ira pe'aroa-Miu kana kanta.