Po'unde-unde 49 - Wunta Mempori

Me'uraa anu nahina tuduno 49:1-21

¹ Tiano petewawado anu mpenani, Inso a inuleno i Kora. Penani po'unde-unde.

² Rongeomo, hei luwuno tongku, ta'oomo biri, hei luwuno palilino tolino,

³ moiko anu motewe maupo anu maramba, moiko anu kaea maupo anu mongkokolaro mperonga-ronga!

⁴ Ngangaku ta mompau ponto'ori anu mentee, ka pine'ihilarono aroaku mopoto'orio pengkonaano.

⁵ Aku tuma'oo biriku a mpowadi, aku pauo teweweuku saru memae katapi.

⁶ Tembio ka kudoito a luwuno oleo masolaa i tempono domengkadu aku puu pontowoki anu lambaha,

⁷ anu mpe'ala-alao arataado, ka mpo'undeakono hadiono kaeado?

⁸ Nahina maupo te'asa mia mokompotolao koroino, ke mompowee pontolosi ndi Ondae Ue Ala euno penaano,

⁹ hangano tedoa masuli olino potolano penaano, ka nahi pototono ranta nahina tampulaano –

¹⁰ ka ipotilalo tuwu mpiha, ka nahi kitao kekeno kaburu.

¹¹ Kitaomo: mia monto'ori mentee mate, mia mebenge-benge ka monge-monge mbo'u memate mperonga-ronga ka mebintao arataado tiano mia susua.

¹² Kaburu onaemo rahado ranta nahina tampulaano, po'iangado mapa'api-api inule; maupo dompompe'ue hadio wita a needo.

¹³ Mia nahi pokompekorahako a laro mpehasilino, onae kana pinotuwu anu ta mate.

¹⁴ Kanatuumo poko'ariano mia anu me'ala-alao koroino onaeno, tempo mateado mia anu mpo'undeakono paudo ondaedo. Sela

¹⁵ Kana bimba domensinaari a laro ntolinodo mia mate, ipakambi ira matea; ondae ntetutu mpetii a laro ngkaburu, rupado tepirego, tolinodo mia mate gagi po'iangado.

¹⁶ Sine Ondae Ue Ala Ira motolao penaaku, manasa Ira dumii aku inso a pokungkuno tolinodo mia mate. Sela

¹⁷ Siimo doito, tewala asa mia gagi kaea, tewala marambano somborino tetiangi,

¹⁸ hangano tempono imate luwuno atuu nahi ta wawao, marambano nahi ta metii tumondao.

¹⁹ Maupo potaeno onae me'ura tempono ituwu, maupo dome'unde-undeo mia, hangano moiko teweweuno,

²⁰ sine onae ta hawe a inuledo uempu'uno, anu nahi ta hori mongkita mewine.

²¹ Mia, anu a laro mpehasilino nahina pomperiono, onae kana pinotuwu anu ta mate.