Po'unde-unde 48 - Wunta Mempori

Sioni, kota-Do Ue Ala 48:1-15

¹ Penani. Penani po'unde-undedo inuleno i Kora.

² Ondae i Ue langkai ka tedoa inunde-unde a ngkota-Do Ue Alato!

³ Torukuno-Do anu mempori, anu kontasi-tasi tekosi, onaemo pino'undeakono asa wawontolino; Torukuno Sioni, kana punsuno Torukuno Saponi, onaemo kota-Do Mokole Langkai.

⁴ A laro luwuno langkanaeno Ondae Ue Ala mepopoto'ori gagi bente.

⁵ Kitaomo, luwuno mokole mpepumpu, ondae melako meronga-ronga;

⁶ tempono dompengkita, ondae ntekokodoho, ntededengke, ka do'amba mpolai mebulalingo.

⁷ Doitoa umalu ira i ra'ai; ondae pompemahaki kana beine anu ta me'ana,

⁸ kana angi i sabaano oleo umalu ira kapala Tarasisi, urawo-rawo ira.

⁹ Hapa anu kimerongeomo, onaemo anu sinakosiimami, i kota-Do Ueno luwuakoano, i kota-Do Ue Alato; Ondae Ue Ala mokorosoo ranta nahina tampulaano. Sela

¹⁰ Kimpe'ihilaroo, oo Ue Ala, pompehohawa-Miu anu nahi bali i laro raha-Miu.

¹¹ Kana nee-Miu, oo Ue Ala, kanatuumo telele-Miu hawe i tompano tolino; kae ngkoana-Miu bukeako moleoa.

¹² Po'ineeomo Torukuno Sioni mawongko; po'ineeomo domengkokora-kora mawongko ana beineno Yehuda hangano pobitara-Miu!

¹³ Limbuomo Sioni ka tanggolilio, doaomo menarano,

¹⁴ pekokoongakonomo rere watuno, pelempamo luwuno benteno, ka impokotutuluo a inule anu lembui:

¹⁵ Mentee ntu'u, Ondaemo andio Ue Ala, Ondaemo mpiha Ue Alato ka nahina tampulaano! Ondaemo anu wawa kita ranta pokotampulaano tumuwu!