Po'unde-unde 47 - Wunta Mempori

Ondae Ue Ala, Mokoleno asa wawontolino 47:1-10

¹ Tiano petewawado anu mpenani. Inso a inuleno i Kora. Penani po'unde-unde.

² Hei luwuno tongku, pontopamo, totowo Iramo Ue Ala saru pebooli mawongko!

³ Hangano mongkokongiri Iramo i Ue, Anu Tedoa Mantande, Mokole langkaino asa wawontolino.

⁴ Ondae mokompetuundu ira tongku i totono pabawamami, luwuno suku tongku a toto ngkarumami

⁵ Ondae mobinikiakami wita pusakamami, pino'undeakono i Yako anu pinehohawa-Do. Sela

⁶ Ondae Ue Ala mewuatako Iramo tinondaako kokora-kora memawongko, Ondae i Ue tinondaako unino tawuwua.

⁷ Penanimo unde-unde Ira Ue Ala, penanimo unde-unde Ira, penanimo unde-unde Ira Mokoleto, penanimo unde-unde Ira!

⁸ Hangano Ondae Ue Ala onaemo Mokoleno asa wawontolino, penanimo po'unde-undeako penani pompaguru!

⁹ Ondae Ue Ala moparenta gagi mokoleno luwuno tongku, Ondae Ue Ala mo'ia a wawo ngkadera poparentaa-Do anu mempori.

¹⁰ Mia mempinemota'udo luwuno tongku mpepumpu gagi bawaa-Do Ue Alano i Burahima. Hangano Ondae Ue Ala anu me'ueo luwuno kantano tolino; Ondae tedoa pinokomaramba.