Po'unde-unde 45 - Wunta Mempori

Penani a tempo petaoano mokole 45:1-18

¹ Tiano petewawado anu mpenani. Montonda nanino Sisi Bonse. Inso a nsuku Kora. Penani pompaguru; penani pompehohawa.

² Aroaku luluaako luwuno pau tekosi, aku mohaweo powadiku ndi mokole; eloku kana penano asa mia puu mpoburi anu pande ntu'u.

³ Omue anu tedoa montama i olodo luwuno anano mia, pe'aroa te'uwu a wiwimu, onaemo pu'uno Doronsokomo Ue Ala ranta nahina tampulaano.

⁴ Tanggoomo ponai a ntongamu, hei puu mpe'iwali, a laro marambamu ka mewantamu!

⁵ Pete'umalaomo ponangia hangano menteea, peleluno mia anu moiko, ka moleoa! Po'ineeomo kae ngkoanamu paguruakomu luwuno wineweu anu mongkokongiri!

⁶ Luwuno ana mpanamu montaso, lumompahio huleno iwalino mokole; luwuno tongku ntedonta a ntoto ngkarumu.

⁷ Kadera poparentaamu Ondae Ue Ala ueno, Ondae mpiha me'ueo ka nahina tampulaano, ka tuko poparentaamu onaemo tuko menteea.

⁸ Omue kumekewoio moleoa ka umo'aliaakono pinogau mosa'o; onaemo pu'uno Ondae Ue Ala, Ue Alamu, umariomo Do'urapiakomu lana po'unde lumaloi ira wali-wali pe'asa mpo'anggamu.

⁹ Luwuno sangkamu mana mire, gaharu, ka sendana; inso a langkanae tindu pemaeno katapi mokonsanaako;

¹⁰ i olodo anu tedoa pinehohawamu hinawe ba opia ana beineno mokole, i koanamu mentade kombiano mokole mesangka wulaa inso i Opiri.

¹¹ Rongeomo, hei ana beine, kitao, ka ta'oomo birimu, kolupeomo tongkumu ka luwuno ihino rahano amamu!

¹² Po'ineeomo mokole gagi mawongko ntu'u aroano hangano tekosimu, hangano onaemo uemu! Penggolontuumo ndi onae!

¹³ Ana beine i Tirusi aiwa saru luwuno pompowee; mia kaea i olodo palili ta mete'umalao aroamu.

¹⁴ Tekosi ntu'u ipewinso ana beineno mokole, sangkano meramba-rambaako wulaa.

¹⁵ Saru sangka sinula mpesora-sora onae winawa ndi mokole; domentondao ana beine, ondae wali-walino anu winawa ndi onae.

¹⁶ Saru mpo'unde ka mengkokora-kora mawongko ondae mewinawa, ondae mpewinso a laro langkanaeno mokole.

¹⁷ Luwuno anamu ta umeu ira uempu'umu omue komotoro ira gagi langkai potorodo i asa wawontolino.

¹⁸ Aku paleleo neemu mapa'api-api inule; onaemo pu'uno luwuno tongku ira me'unde-undeko mpiha ka nahina tampulaano.