Po'unde-unde 44 - Wunta Mempori

Peraalino tongku anu tepokonsii 44:1-27

¹ Tiano petewawado anu mpenani. Inso a inuleno i Kora. Penani pompaguru.

² Oo Ue Ala, saru birimami isa'a kimerongeomo, domentutuluomo uempu'umami ndi omami wineweu anu Iweweuomo i tempodo, i tempo se'eluno.

³ Saru kae-Miu isa'a Isaari iramo tongku, ka Itano ira; Isolangi ira suku tongku, Ipo'inee ira ntetiangi.

⁴ Hangano komba saru ponai dompetorokio wita, ka komba tokiado mompowee ponangia, tendeano kae ngkoana-Miu ka tokia-Miu saru wantano rupa-Miu, hangano Ipemoiko ira.

⁵ Omiumo Mokoleku ka Ue Alaku anu parentao ponangino i Yako.

⁶ Sarumo Omiu kimedadai ira mposuka luwuno iwalimami, sarumo nee-Miu kimelolandao mia anu mentade sumapoi kami.

⁷ Hangano komba a mpanaku kumpompe'ala-ala, ka maupo ponaiku nahi poweeakune ponangia,

⁸ sine Omiumo anu moweeakami ponangia a mpe'ewaamami, ka luwuno mia anu umo'aliaakami Ipokoko'ii ira.

⁹ Hangano Ondae Ue Ala, omami mpenaniako po'unde-unde i larono asa oleo, ka tiano nee-Miu omami mempauo po'unde-unde nahina tampulaano. Sela

¹⁰ Sine Itadi kamimo ka mo'inee kami mempinokoko'ii, Omiu nahi lako meronga bawaano sorodadumami.

¹¹ Omiu weweu kami mposuka inso a iwalimami, ka luwuno mia anu umo'aliaakami merontu kami.

¹² Omiu meweengako kami gagi bimba sumbelea ka sumiarawo kami i olodo luwuno tongku.

¹³ Omiu umasa ira bawaa-Miu nahina olino ka nahi po'ala ura hapa-hapa inso a mpo'asaa atuu.

¹⁴ Omiu weweu kami gagi popodeu-deuado pehori rahamami, gagi pasinggiria ka tetewehiado mia pehori-horimami.

¹⁵ Omiu weweu kami gagi pasinggiria i olodo tongku, onaemo pu'uno luwuno suku tongku mebitu-bitu ulu.

¹⁶ Ranta sumoo oleo ongkue montembi mokoko'iia, ka mokoko'ii anu nahi tepahihi,

¹⁷ hangano paudo mia anu montata ka mompepaukiako, hangano tepo'aroako iwali ka anu monaa-naa aroa.

¹⁸ Luwuno andio i'alu kamimo, sine nahi kimengkolupe Komiu, ka nahi kimehapuo pedandia-Miu.

¹⁹ Aroamami komba umewa ka pelempamami nahi pansia inso a mpesalaa-Miu,

²⁰ sine Isolangi kamimo a mpo'iangano serigala, ka tumutuwiakami wongi-wongia.

²¹ Ande-andeno kimengkolupeo nee-Do Ue Alamami, ka mentandeo kaemami a mpinesombai susua,

²² nde nahi Ira mepenteeo Ue Ala? Hangano Ondae mewinsokio luwuno laro aroa!

²³ Hangano Omiu mekongko kami a laro mpo'aropi matea ranta sumoo oleo, omami tinudu kana luwuno bimba sumbelea.

²⁴ Ipekaangakomo! Tembio ka Ipoturi, oo Ue? Ipewangumo! Siimo Itadi kami mpiha!

²⁵ Tembio ka Iwunio rupa-Miu ka kumolupeo pompokonsii ka pompokomarasai ndi omami?

²⁶ Hangano omami ntedunsi a laro pampawu, omami mpe'opo a wita.

²⁷ Ipepatindamo tumulungi kami, potola kamimo hangano pompehohawa-Miu anu nahi bali!