Po'unde-unde 40 - Wunta Mempori

Po'unde-unde ka pekakai

¹ Tiano petewawado anu mpenani. Penani po'unde-undeno i Daudi.

² Tedoa aku sumisikori Ira i Ue; ka Do'amba mewolili ka rumongeo pebooliku mepetulungi.

³ Ondae tumande aku inso a aa matea, inso a regeno epe; Ondae numaao karuku a wawo pongku watu, pakosio pelempaku,

⁴ Donaao penani wo'ohu a laro ngangaku unde-unde-Do Ue Alato. Hadio mia ta kumitao ka gagi doito, ka do'amba mpe'ala-ala Ira i Ue.

⁵ Me'uraomo mia anu numaao pompe'ala-alano ndi Ondae i Ue, anu nahi pewolili a mia mompelangka-langkai, ke pansia a anu tumonda ira puu mpegaupi.

⁶ Hadioomo anu wineweu-Miu, oo Ue, Ue Alaku, wineweu-Miu anu kinohali-haliako ka tinoo-Miu ndi omami. Nahina anu polio pinongkenaako saru Omiu! Ineheku paleleo ka pauo, sine tedoa hadio porokono ba idinoa.

⁷ Omiu nahi pemoikoo pesomba sinumbele ka pesomba kaanga, sine I'ungkahiomo biriku; pesomba tinunu ka pesomba po'onini hala nahi Ituntuo.

⁸ Ka ku'amba motae, ”Mentee ntu'u, ongkue aiwa; a laro paluluno wunta hinao binuri mongkona ongkue;

⁹ ineheku weweuo po'ehe-Miu, oo Ue Alaku; Songka-Miu kongko ilaro aroaku.”

¹⁰ Kupaleleo moleoa a laro bawaa anu langkai; tendeano nahi ku'ontoo wiwiku, Omiu tumo'orio, oo Ue.

¹¹ Moleoa komba kuwunio i laro aroaku, pokongkomi-Miu ka pongkadudui-Miu kupopauo, pompehohawa-Miu ka mentee-Miu komba kupo'iaakono a bawaa anu langkai.

¹² Omiu, Ue, si ontoo pompowee-Miu ndi ongkue, pompehohawa-Miu ka mentee-Miu po'ineeomo dumagai aku mpiha!

¹³ Hangano masolaa kumadu aku hawe nahi pinokodoa hadiono. Ka salaku, hawe nahi kupolio mbo'u kumitao; hadioopo porokono sekonopo wuu a uluku, onaemo ka kutelusa.

¹⁴ Moikoomo oo Ue Ipotola aku; Ue, Irongamo tumulungi aku!

¹⁵ Po'ineeomo ipinokongkodei ka kongira-ngira luwuno anu momporaakono ka ipingko penaaku; po'ineeomo domposuka ka ikona ira mokoko'iia anu inehedo ka kumasola!

¹⁶ Po'ineeomo dompenoro-noro hangano mokoko'ii anu mpepaukiakune, ”Losoko, losoko!”

¹⁷ Po'ineeomo domemawongko ka mpo'unde hangano Omiu luwuno mia anu umungke Komiu; po'ineeomo ondae anu mpokekewoi tekaduduia inso ndi Omiu kongko mpiha mpotae, ”Ondae i Ue atuu langkai!”

¹⁸ Ongkue andio marasai ka mongkokolaro, sine Ondae i Ue merio aku. Omiumo anu tumulungi aku ka motola aku, oo Ue Alaku, Iliumo hawe!