Po'unde-unde 4 - Wunta Mempori

Pekakai tempono wongi 4:1-9

¹ Tiano petewawado anu mpenani. Saru pemaeno katapi. Penani po'unde-undeno i Daudi.

² Tewala ongkue mebooli, Isangki akumo, oo Ue Ala, anu mokomentee aku. A laro ma'isoa Omiu moweeakune koloaa. Ipehohawa akumo ka Irongeomo pekakaiku!

³ Hei luwuno mia anu langkai potorono, opiapo mbo'u tehineno isinosa'ai maramba-Ku, opiapo mbo'u tehineno imengkekewoio anu nahina tuduno ka mpo'ungke pegaupi? Sela

⁴ To'oriomo, Ondae i Ue Dobinikiomo tia-Do asa mia anu pinehohawa-Do; Ondae i Ue merorongeakono tewala mebooli aku ndi Ondae.

⁵ Po'ineeomo intekuda, sine si mpoweweu hala; impepaumo i laro aroamiu a mpoturiamiu, sine impenoro-noro koa mpiha. Sela

⁶ Pesombaakonomo pesomba anu tekona ka pe'ala-ala Iramo i Ue.

⁷ Hadio mia mpotae, ”Isema anu ta mopokitao anu moiko ndi ontae?” Po'ineeomo wantano rupa-Miu pansari kami, oo Ue!

⁸ Sine Ipowee akumo mawongkoa i laro aroaku, lumaloio mawongkoa tempono hadio ntu'u gandudo ka anggoro.

⁹ Saru rodo aku mepombole, ka ku'amba ronga moturi, hangano butu koa Omiu, oo Ue, anu weweu aku tuwu rodo.