Po'unde-unde 39 - Wunta Mempori

Pekakai mepetulungi 39:1-14

¹ Tiano petewawa puu mpenani. Tiano i Yedutuni. Penani po'unde-undeno i Daudi.

² Ndiomo pomputusiku, ”Aku dumagaio peleluku, nahi kutehalaako eloku; aku umontoakono sama ngangaku i larono mia mosa'o gauno da kongko i aroku.”

³ Tekonso elo aku, merodo-rodo aku nahi kupepau, komino aku inso mongkona anu moiko, sine marasaiku komobe-mobeano.

⁴ Aroaku tensila a laro ngkoroiku, pompemasusaku kana api anu melanga, mansa aku merokuhi mepauako eloku,

⁵ ”Oo Ue, Ipauakunemo tempo mateaku, ka hapa tompaano tinuwuku, ka kuto'orio nahi aku tuwu mpiha!

⁶ Kitao, butu ba opia otuwe koa Itantuio tinuwuku; ka tempo tumuwuku kana mooa i aro-Miu. Oo, mia butu tuwu tempono hinao penaano! Sela

⁷ Onae telalo kana eo-eo! Mia butu mohohoiako anu nahina tuduno onae mohowu, sine nahi tino'ori isema anu humaweo te'ipua.

⁸ Kanandio-andio, hapake anu sinisikoriku, oo Ue? Pomperorohiaku butu ndi Omiu.

⁹ Ipotola akumo inso a luwuno polimpa'iku, si pokogagi aku tetewehiano mia monge-monge!

¹⁰ Tekonso elo aku, nahi ku'ungkahio ngangaku, hangano Omiumo anu weweuo luwuno atuu.

¹¹ Ipoko'olaiomo petunduhi-Miu inso ndi ongkue, tepirego aku hangano pesapoino kae-Miu.

¹² Omiu tumunduhiakono pohuku asa mia hangano salano, ka kumaano pingko tekosino mengkena kana ule-ule; mentee ntu'u, sompo mia butu nahina tuduno. Sela

¹³ Rongeomo pekakaiku, oo Ue, ka Ipo'aroomo biri-Miu a mpebooliku mepetulungi, siimo Ipenoro-noro kumitao uwoi mataku! Hangano ongkue andio mia hawe anu mo'ia meronga saru Omiu, mia hawe kana luwuno uempu'uku.

¹⁴ Ilimbaomo pengkita-Miu inso ndi ongkue, ka kupo'unde se'eluno napi kulako ka nami hina mbo'u!”