Po'unde-unde 38 - Wunta Mempori

Pekakai i tempono mahaki 38:1-23

¹ Penani po'unde-undeno i Daudi i tempono mompesombaako pesomba pompopoto'ori.

² Ue, siimo Ihuku aku a laro bamburu-Miu, ka siimo Itunduhi aku a laro tensilano tekuda-Miu;

³ hangano ana mpana-Miu lumompahi aku, kae-Miu dumanso aku.

⁴ Nahina anu madoo a ngkoroiku hangano bamburu-Miu, nahina anu madoo a luwuno wukuku hangano halaku;

⁵ hangano uluku i'aluomo salaku; hangano kana tinembi anu tedoa kupemobeao.

⁶ Luwuno mobelaku mana moboo, menana hangano benge-bengeku;

⁷ ongkue tepe'odo ka tedoa tetuundu; te'asa oleo ongkue mo'ia a laro pompemasusa.

⁸ Hangano tongaku mompemahaki ntu'u, nahina anu madoo a ngkoroiku;

⁹ piingko rosoku ka tedoa tededengke, meraali aku hangano aroaku tedoa mompemasusa.

¹⁰ Ue, Omiu tumo'orio luwuno ineheku, ka pompemasusaku mbo'u nahi tewuni ndi Omiu;

¹¹ huleku mondende, rosoku tetadi, ka wantano mataku mbo'u tampulaomo.

¹² Luwuno sambe'eku ka wali-waliku mpeliahako hangano hakiku, ka pe'etuku mpe'olaiako.

¹³ Luwuno mia anu mpomporaakono penaaku mpota'o oho, luwuno mia anu mposongkaakono masolaaku, mpompewowolo masolaa ka mposongka pompopo'oo te'asa oleo.

¹⁴ Sine ongkue andio kana mia anu nahi pokomporonge, kana mia beebe anu nahi pokompepau;

¹⁵ oo, ongkue andio kana mia anu nahi poronge, anu nahina sangkino a laro ngangano.

¹⁶ Hangano ndi Omiu, oo Ue, kupomperorohi; Omiumo anu Komiu sumangki, oo Ue, Ue Alaku.

¹⁷ Kupewowoloo, ”Ba mansa dompengingisiakune, ka mpo'undeakune tewala leelu karuku!”

¹⁸ Lano ilawupo ka kutetidu, ka wela i'alu aku pompemahaki;

¹⁹ oo, kumangakuakono salaku, salalaro aku hangano halaku.

²⁰ Mia anu me'o'aliaakune nahina pepu'uano mehadio ira, hadioomo mia anu umo'aliaakune nahina pepu'uano;

²¹ domposuloako anu mosa'o ndi ongkue euno anu moiko, dome'o'aliaakune, hangano mo'ungke aku anu moiko.

²² Si binta aku, oo Ue, Ue Alaku, si olai inso ndi ongkue!

²³ Rongamo Itulungi aku, oo Ue, tekaduduiaku!