Po'unde-unde 37 - Wunta Mempori

Me'urano mia mosa'o gauno nahi tehine 37:1-40

¹ Inso ndi Daudi. Si bamburu a mia moweweu mosa'o, si mosisiriakono mia anu moweweu molengku;

² hangano ira ronga memoleu kana ewo ka moleu kana luwuno pinopaho molowulu.

³ Pe'ala-ala Iramo i Ue ka weweuomo anu moiko, po'iamo i wita andio ka petenunumo.

⁴ Po'undemo ndi Ondae i Ue; ka Ira moweeakomu tinoono aroamu.

⁵ Peweengakonomo pesalaamu ndi Ondae i Ue ka pe'ala-ala Iramo, asalakono Ira mongkadudui;

⁶ Ira mosabao menteemu kana mewine, ka tiamu kana meene.

⁷ Pomperodomo ndi Ondae i Ue ka sikori Iramo; si bamburu a mia anu mehasili a laro ntumuwuno, a mia anu moweweu pompopo'oo.

⁸ Penaa-naamo tekuda ka bintaomo mokulano aroa atuu, si bamburu, atuu butu mowawa a mosa'oa.

⁹ Hangano mia anu moweweu mosa'o ta pinokotampula, sine mia anu sumisikori Ira i Ue ta me'ueo wita andio.

¹⁰ Hangano nami tehine mbo'u, ka tampulaomo mia mosa'o gauno; tewala upekokoongakono po'iangano, ka onae nahi kongko mbo'u.

¹¹ Sine mia anu me'urumako ta me'ueo wita andio ka mo'unde hangano manangaia anu hadio ntu'u.

¹² Mia mosa'o gauno mosongka mosa'oa a mia mentee ka ipokingkiakono;

¹³ Ondae i Ue mengingisiakono mia mosa'o gauno atuu, hangano Dokitao nine oleono umpedaomo.

¹⁴ Mia mosa'o gaudo mpobuta ponai ka mediio panado ira mpobangkuo mia marasai ka mia mongkokolaro, ira mensumbeleo mia anu moleo pesalaano;

¹⁵ sine ponaido ta tumoboo radado ondaedo, ka panado ta pinudu.

¹⁶ Moikoopo anu tedei a mia mentee sekonopo anu hadio ntu'u a mia mosa'o gauno;

¹⁷ hangano tokiano mia mosa'o gauno ta pinudu, sine Ondae i Ue kumaduduio mia mentee.

¹⁸ Ondae i Ue merioo tuwuno mia moleo, ka tia pusakado ta kongko mpiha nahina tampulaano;

¹⁹ ondae nahi domempinokoko'ii i tempono masolaa, ka ira memowohi a luwuno oleo mokoninggoa.

²⁰ Menteeano mia mosa'o gauno ta mate; iwali-Do i Ue ta tampula kana tekosino ewo pada, ondae metampula kana ahu.

²¹ Mia mosa'o gauno monsabo ka nahi wali umowahio, sine mia mentee wela mompehohawa ka me'aroa.

²² Menteeano, mia anu rinonso-Do i Ue ta me'ueo wita andio, sine luwuno mia anu tinotonaa-Do ira mempinokotampula.

²³ Ondae i Ue pakosio pelempano mia anu tuwuno Dopemoikoo;

²⁴ tewala onae tedonta, nahi ta tepombole, hangano Ondae i Ue tumumboo kaeno.

²⁵ I ndi'ipua ongkue mongura, kanandio-andio gagi akumo mota'u, sine nahi kuhori mongkita mia mentee bininta, ke inuleno mo'ema-ema roti;

²⁶ sompo oleo onae mompehohawa ka mompesaboako, ka inuleno gagi ronso.

²⁷ Olaiakono anu mosa'o ka weweuomo anu moiko, ka omue komo'ia mpiha ranta nahina tampulaano;

²⁸ hangano Ondae i Ue kumekewoio songka, ka nahi Dobintao mia anu pinehohawa-Do. Mia moweweu mosa'o ta pinepate ranta nahina tampulaano, ka inuleno mia mosa'o gauno ta pinokotampula.

²⁹ Mia mentee ta me'ueo wita andio ka wela mo'ia i ra'ai.

³⁰ Ngangano mia mentee mompau ponto'ori anu mentee, ka elono mompopau songka;

³¹ Taura-Do Ue Alano kongko i laro aroano, pelempano nahi telelu.

³² Mia mosa'o gauno momporaakono mia mentee ka montoo mepateo;

³³ sine Ondae i Ue nahi Dopo'ineeo mia mentee tedonta a ngkaeno, nahi Dopo'ineeo pinokonsala i tempono binitara.

³⁴ Sikori Iramo i Ue ka tondaomo mpiha pesalaa-Do, ka Ira tumandeko ka upe'ueo wita andio, ka kokumitao mia mosa'o gauno pinokotampula.

³⁵ Hori aku mongkita asa mia mosa'o gauno anu lambaha, anu tuwu te'ili kana keu arasi Libano;

³⁶ tempono kutelalo, onae moliu, ku'ungkeo, sine nahi kuhaweo mbo'u.

³⁷ Pekokoongakono mia anu moleo aroano ka pepenteeomo mia anu nahi molengku, hangano a mia anu ineheno manangai ta hina oleo ramaino;

³⁸ sine anu mebuunto ira mempinepate mperonga-ronga, ka oleo ramaino mia mosa'o gauno ta pinokotampula.

³⁹ Mia mentee Dokaduduio i Ue; pepekaduduiado i tempono ma'isoa;

⁴⁰ Ondae i Ue montulungi ka motola ira, Ondae motola ira inso a ngkaeno mia mosa'o gauno ka kumadudui ira, hangano mpepekadudui ira ndi Ondae.