Po'unde-unde 35 - Wunta Mempori

Pekakai mo'ema pepetulungi hangano iwali 35:1-28

¹ Inso ndi Daudi. Ewai iramo mia anu umewai aku, oo Ue, Ipeteamo umewaio mia anu meteaakune!

² Iniomo kanta, Ipentademo tumulungi aku,

³ Ibutaomo kansai ka uase umaropi ira mia anu lumampui aku; Ipotaemo a nsumangaku, ”Ongkuemo tekaduduiamu!”

⁴ Po'ineeomo domempinokoko'ii ka mentinata mia anu inehedo me'oninio penaaku; po'ineeomo domposuka ka mempinokongkodei mia anu mpontoo masolaaku!

⁵ Po'ineeomo ondae kana kulino pae ipuurio angi, dinandano Mala'eka-Do i Ue;

⁶ po'ineeomo pesalaado ka iwongi-wongi ka molore, ka Mala'eka-Do i Ue lumampui ira!

⁷ Hangano nahina pepu'uano ondae mponta'oakune buani, nahina pepu'uano ondae mpokeke aa tiano penaaku.

⁸ Po'ineeomo matea humaweo nahi kinoo-koo, oho anu tina'ono, po'ineeomo onaeno irakoo, po'ineeomo ka itedonta ka ropu!

⁹ Sine ongkue mebooli mo'unde hangano Ondae i Ue, ka mawongko hangano tekaduduia inso ndi Ondae;

¹⁰ luwuno wukuku motae, ”Oo, Ue, isemake kana Omiu, anu motolao mia marasai inso a ngkaeno mia anu lalu moroso, mia memarasai ka mongkokolaro inso a ngkaeno mia anu rumontuo?”

¹¹ Luwuno sakosii anu lambaha mpentade, ka mentuluri aku mongkona anu nahi tino'ori.

¹² Moikoku domensuloakono mosa'oa; kana akumo tuwu asa-asaku.

¹³ Sine ongkue, tempono domemahaki, kupokonao sawu po'inombo; ka me'urumako saru mepuasa, ka mekakai mbo'u saru metuundu,

¹⁴ kana asa sambe'e ke pepaekompo, kanatuumo peleluku; kana asa mia anu sumabangio mateano ineno, kanatuumo kupetuundu.

¹⁵ Sine mansaku tetidu, mpo'unde iramo ka mpenggowo, ondae mpenggowo mensapoi aku, kana mia hawe anu nahi kuto'orio ondae mentata aku nahi dompenaa-naa,

¹⁶ ondae mpepauki kana mia mosa'o gauno, dompokingkiakune.

¹⁷ Opiapo mbo'u tehineno, Ue, Komiu butu mengkita-kita? Ikaduduiomo sumangaku inso a pomperangkamido, penaaku inso a luwuno singa mongura!

¹⁸ Aku menaniako po'unde-unde ndi omiu a laro bawaa anu langkai, i tonga-tongano palili anu hadio aku umunde-unde Komiu.

¹⁹ Osi'i ntu'u impo'undeakune luwuno mia anu me'iwaliakune nahina pepu'uano, ke megiru-giruo matado mia anu umo'aliaakune nahina pu'uno.

²⁰ Hangano nahi dopompau sintuwu, ka a luwuno mia anu mpesisintuwu i witado ondae mposongka pompopo'oo,

²¹ ondae mpenganga langkai ndi ongkue ka mpotae, ”Losoko, losoko, saru matamami isa'a mensakosiio!”

²² Omiu mbo'u Isakosiiomo, Ue, si penoro-noro, oo Ue, si olai inso ndi ongkue!

²³ Ipekaangakomo ka Ipewangumo kumorahakono tiaku, korahakonomo kara-karaku, oo Ue Alaku ka Ueku!

²⁴ Ibitara akumo menunu saru moleo-Miu, oo Ue Alaku, ka si dompo'undeakune!

²⁵ Si dompotae i laro aroado, ”Losoko, onaemo atuu inehemami!” Ka si dompotae, ”Kimenteleomo!”

²⁶ Po'ineeomo domempinokoko'ii ka kongira-ngira luwuno mia anu mpo'undeakono urasa'oku; po'ineeomo mokoko'ii ka pontata gagi pesangkado mia anu pelangkaio koroido ndi ongkue!

²⁷ Po'ineeomo domengkokora-kora memawongko ka mpo'unde mia anu ineheno kumita aku pinokomentee! Po'ineeomo dokongko mpotae, ”Ondae i Ue atuu langkai, Inehe-Do tekaduduiano tetenaa-Do!”

²⁸ Ka eloku ta wela pauo moleo-Miu, umunde-unde Komiu i larono asa oleo.