Po'unde-unde 34 - Wunta Mempori

A laro pongkadudui-Do i Ue

¹ Inso ndi Daudi, i tempono onae mo'onde-onde nahi molino pinewowolono i arono i Abimele, onaemo ka isinaari, ka i'amba lumako.

² Aku umunde-unde Ira i Ue a luwuno tempo; po'unde-unde ndi Ondae kongko mpiha a laro ngangaku.

³ Hangano Ondae i Ue sumangaku mo'unde; po'ineeomo domerongeo mia memauru ka memawongko.

⁴ Unde-unde Iramo i Ue meronga ongkue, aiwamo tomperonga-ronga paleleo nee-Do!

⁵ Ku'ungke Iramo i Ue, ka Do'amba sumangki aku, ka motola aku inso a luwuno doitoku.

⁶ Kita Iramo, asalakono rupamu ta mewanta ka nahi ta kongira-ngira.

⁷ Mia anu tepokonsii andio mebooli, ka Dorongeo i Ue, Ondae kumaduduio inso a pompema'isono.

⁸ Mala'eka-Do i Ue mpekema lumimbu ira mia anu dumoitoako Ira, ka do'amba mpotola ira.

⁹ Impe'arahakono ka kitaomo, Ondae i Ue tedoa moiko! Me'uraomo mia anu mepekadudui ndi Ondae!

¹⁰ Doitoako Iramo i Ue, hei luwuno mia mempori, hangano mia anu dumoitoako Ira nahi ta mompemakura!

¹¹ Luwuno singa mongura memarasai mokoninggo, sine luwuno mia anu umungke Ira i Ue, nahi pompemakura maupo te'asa anu moiko.

¹² Aiwamo nana'ote, ronge akumo, aku paguruakomiu dumoitoako Ira i Ue!

¹³ Isema i olomiu anu nahi kekewoio tumuwu, ka momperorohi luwuno oleo buke me'uraa?

¹⁴ Tangkoroomo elomu inso anu mosa'o ka wiwimu inso a mpinau anu mompopo'oo;

¹⁵ olaiakonomo anu mosa'o ka weweuomo anu moiko, ungkeomo pesintuwua ka uhaweomo!

¹⁶ Mata-Do i Ue te'aro a luwuno mia mentee, ka biri-Do a mpeboolido mpepetulungi;

¹⁷ rupa-Do i Ue umewai ira mia anu mpoweweu mosa'o ka mokotampulao rambeado inso i wawontolino.

¹⁸ Luwuno mia mentee mpeboo-booli, ka Dorongeo i Ue, Dopotola ira inso a pompema'isodo.

¹⁹ Ondae i Ue atuu umpeda a luwuno mia anu tedoa masusa aroano, ka Dokadudui ira mia anu tetadi pomperorohino.

²⁰ Hadio urasa'ono mia mentee, sine Ondae i Ue motolao inso a luwuno atuu;

²¹ Ondae dumagaio luwuno wukuno, nahina maupo te'asa ta tepudu.

²² Urasa'oa ta mepateo mia mosa'o gauno, ka isema anu umo'aliaakono mia mentee ta tumembio pohuku.

²³ Ondae i Ue motolao sumangado tetenaa-Do, ka luwuno mia anu mpepekadudui ndi Ondae nahi ira mpontembi pohuku.