Po'unde-unde 33 - Wunta Mempori

Po'unde-unde ndi Ondae Ue Alado to Isaraeli 33:1-22

¹ Imengkokora-koramo memawongko, hei luwuno mia mentee, ndi Ondae i Ue! Hangano mo'unde-unde atuu tekona a luwuno mia moleo aroa.

² Pontarimakasimo ndi Ondae i Ue mompake katapi, penanimo unde-undeako Ira gambusu hopulu koloro!

³ Penaniako Iramo penani wo'ohu; tingkoomo katapi temomoiko saru mengkokora-kora mawongko!

⁴ Hangano pau-Do i Ue atuu mentee, luwuakoano Do'anggaakono petenunu.

⁵ Dopesanaao moleoa ka songka; tolino bukeako pompehohawa-Do i Ue anu nahi bali.

⁶ Hangano pau-Do i Ue langi pinokogagiomo, hangano penaano nganga-Do luwuno sorodaduno.

⁷ Ondae pumpuo uwoino tahi kana asa hinowu, Ondae numaao luwuno tahi malua a laro asa popumpua.

⁸ Po'ineeomo luwuno tolino dumoitoako Ira i Ue, po'ineeomo luwuno palilino wawontolino dumoitoako Ira!

⁹ Hangano Ondae mepau, ka luwuno gagi; Ondae mompowee parenta, ka luwuno hinao.

¹⁰ Ondae i Ue nahi Dopokogagio sinongkado luwuno tongku; Ondae umoninio sinongkado suku tongku;

¹¹ sine tinoo-Do i Ue kongko mpiha ranta nahina tampulaano, tinoono aroa-Do mapa'api-api inule.

¹² Me'uraomo tongku, anu Ue Alano onaemo Ondae i Ue, suku tongku anu bininiki-Do gagi Ondae-Do me'ueo!

¹³ Ondae i Ue mensiro inso i suruga, Dokitao luwuno anano mia;

¹⁴ inso a mpo'ianga-Do Doparesao luwuno palilino tolino.

¹⁵ Ondae anu weweuo aroado luwudo, anu merioo luwuno inanggado.

¹⁶ Asa mokole nahi ta tekadudui hangano hadiono sorodaduno; asa puu mpetea nahi ta tola hangano langkaino roso.

¹⁷ Ngara onaemo pomperorohia nahina tuduno ka ihinawe ponangia, maupo kana'umpe magasino nahi weweuo mia tola.

¹⁸ Menteeano, mata-Do i Ue te'aro ndi ondae anu doitoako Ira, ndi ondae anu mpomperorohi pompehohawa-Do anu nahi bali,

¹⁹ anu motolao sumangado inso a matea ka mekariao tuwudo i tempono mokoninggoa.

²⁰ Sumangato sumisikori Ira i Ue. Ondaemo puu pontulungito ka kantato!

²¹ Oo, hangano Ondae aroato mawongko, hangano a nee-Do anu mempori tompompe'ala-ala.

²² Pompehohawa-Miu, oo Ue, po'ineeomo ka ikongkomi kami, kana pomperorohimami ndi Omiu.