Po'unde-unde 31 - Wunta Mempori

Rodo a ngkae-Do i Ue 31:1-25

¹ Tiano petewawado anu mpenani. Penani po'unde-undeno i Daudi.

² Ndi Omiu, Ue kupepekadudui, osi'i ntu'u kupinokoko'ii. Ipotola akumo hangano moleo-Miu,

³ Ita'oomo biri-Miu ndi ongkue, rongamo Ipotola aku! Igagimo torukuno watu pepekaduduiaku, bente pekorahakoa ka kutekadudui!

⁴ Hangano Omiumo pongku watuku ka pekorahakoaku, ka anee-Miu Itaate akumo ka Iwawa aku.

⁵ Iluarako akumo inso a buani anu dompota'oakune mia, hangano Omiumo pepekaduduiaku.

⁶ A ngkae-Miumo kupeweengakono penaaku; Itolosi akumo, oo Ue, Ue Ala anu nahina balino.

⁷ Omiu umo'aliaako ira mia anu melangkaio lahumoa anu nahina pengkonaano, sine ongkue me'ala-ala Ira i Ue.

⁸ Aku meboo-booli ka mo'unde hangano pompehohawa-Miu nahi bali, hangano Ipepenteeomo marasaiku, Ito'oriomo ma'isono sumangaku,

⁹ Ipeweengako akumo a ngkaeno iwali, sine montadeo karuku a mpo'ianga anu malua.

¹⁰ Ipehohawa akumo, oo Ue, hangano ongkue mompema'iso; mataku mowewu ka sumanga ka koroiku me'i'isei hangano mahaki aroa.

¹¹ Tuwuku piningko a laro masusaa ka luwuno ta'u ntumuwuku a laro pompemasusa; rosoku metii hangano marasaiku, ka luwuno wukuku gagi motopu.

¹² Gagi aku tataado luwuno iwaliku, bebeatido pehori rahaku, ka mokontededengke ira tepoto'oriku; ondae anu mengkita aku a nsala ira mpolai.

¹³ Tetadi akumo inso a mpinewowolo kana mia mate, gagiomo kana kusi anu tepeha.

¹⁴ Hangano kurongeo pau-paudo mia hadio, — doitoa hawe inso a luwuno lakoa! — ondae mperonga-ronga ntepo'asa mensolangi aku, tinoodo ira me'oninio penaaku.

¹⁵ Sine ongkue, ndi Omiu kupompe'ala-ala, oo Ue, kupotae, ”Omiumo Ue Alaku!”

¹⁶ Tumuwuku a laro ngkae-Miu, Ipotola akumo inso a ngkaeno iwali anu lumampui aku!

¹⁷ Iweweuomo rupa-Miu mewanta a ntetenaa-Miu, Ikadudui akumo hangano pompehohawa-Miu anu nahi bali!

¹⁸ Ue, si po'inee aku pinokoko'ii, hangano mebooli aku ndi Omiu; po'inee iramo mia mosa'o gaudo mempinokoko'ii ka mpetii a ntolinodo mia mate ka mengkomino.

¹⁹ Po'ineeomo wiwi mpegaupi gagi nahi pokompepau, anu mompepaukiako mia mentee saru pompelangka-langkai ka pompokongkodei!

²⁰ Tedoa ntu'u hadio moiko-Miu anu Ipatindaakonomo mia anu doitoa-Komiu, anu Iweweuakonomo mia anu mepekadudui ndi Omiu, i arodo mia!

²¹ Omiu wuni ira a laro pe'egoano rupa-Miu inso a mpedandiado mia mpoweweu mosa'o; Omiu kumadudui ira a laro laika inso a elo anu ineheno mengenge.

²² Inunde-unde Iramo i Ue anu mopokitaomo pompehohawa-Do nahi bali anu kinohali-haliako ndi ongkue a laro ngkota anu mebente.

²³ A laro sala-laroku hori aku mepau, ”Tinadi akumo inso i aro-Miu.” Sine menteeano Omiu rumongeo po'emaku, tempono kupebooli ndi Omiu mepetulungi.

²⁴ Pehohawa Iramo i Ue, hei luwuno mia anu pinehohawa-Do! Ondae i Ue dumagai ira mia anu mpetenunu, sine mia anu mpompelangka-langkai Dohuku ira mobea.

²⁵ Pokorosoomo ka pedatoomo aroamu, hei luwuno mia anu momperorohi ndi Ondae i Ue!