Po'unde-unde 30 - Wunta Mempori

Penani po'unde-unde hangano tekadudui inso a masolaa 30:1-13

¹ Penani po'unde-unde. Penani tiano poronsoa Raha Mempori. Inso ndi Daudi.

² Aku umunde-unde Komiu, oo Ue, hangano Ipadii akumo i wawono, ka nahi weeako ira iwaliku mpo'undeakune.

³ Ue, Ue Alaku, ndi Omiu kupebooli mepetulungi, ka Ipokotompa akumo.

⁴ Ue, Omiu tumande aku inso a ntolinodo mia mate, Omiu kumaduduio tuwuku ranta nahi kupetii a laro ngkaburu.

⁵ Penaniakonomo penani umunde-unde Ira i Ue, hei luwuno mia anu pinehohawa-Do, ka impesombaakonomo po'unde-unde a nee-Do anu mempori!

⁶ Hangano sarai koa Dotekuda, sine pe'aroa-Do asa ntinuwu; asa wongi hinao pengesea, tamo hawe mo'oru teronge pebooli mawongko.

⁷ Tempono kumanangai hori aku motae, ”Nahi aku telelu ranta nahina tampulaano!”

⁸ Ue, hangano Ipemoikoo, Inaa akumo a wawo ntorukuno anu moroso; tempono Iwunio rupa-Miu, ka ku'amba tededengke.

⁹ Ndi Omiu, oo Ue, kupebooli, ka ndi Ondae Ueku kupo'ema pompehohawa,

¹⁰ ”Hapake urano tewala penaaku binuta, tewala metii aku a laro kekeno kaburu? Polioke pampawu umunde-unde Komiu ka paleleo petenunu-Mu?

¹¹ Irongeomo, Ue, ka Ipehohawa aku, Ue, Igagimo pontulungiku!”

¹² Ponsabangiku Ibaliomo gagi po'ense-ense mawongko, sangka po'inomboku Ilohuo, sangka mawongkoa Iponaakune,

¹³ ka ipenaniako sumangaku penani umunde-unde Komiu ka nahi po'ia rodo. Ondae i Ue, Ue Alaku, ranta nahina tampulaano aku menani umunde-unde Komiu.