Po'unde-unde 27 - Wunta Mempori

Rodo a laro pongkadudui-Do Ue Ala 27:1-14

¹ Inso ndi Daudi. Ondaemo i Ue wantaku ka tekaduduiaku, ndi semake asalakono aku doito? Ondaemo i Ue benteno tuwuku, ndi semake asalakono aku mondende?

² Tempono anu mpoweweu mosa'o mensapoi aku ira mengkaano bauku, luwuno anu umewai aku ka iwaliku atuu, manasa ntetidu ka ntedonta.

³ Maupo bawaano sorodadu mpekema mengkadu aku, aroaku nahi ta doito; maupo mompu'uomo peteaa umewai aku, mompe'ala-ala aku mpiha.

⁴ Asa rupa ku'emaomo ndi Ondae i Ue, butu onae andio anu tedoa ineheku: mo'ia a raha-Do i Ue asa ntinuwuku, sumakosiio pe'aroa-Do i Ue ka sanaa mo'iangario raha-Do.

⁵ Hangano Ira kumadudui aku a laro laika-Do i tempono hinao mompokodoito; Ondae wuni aku a laro mpewunia a ngkema-Do, ka tumande aku a wawo ntorukuno watu.

⁶ Ka kanandio-andio kupontadeo uluku, umaropi ira iwali anu kumadu aku; a laro ngkema-Do kupesombaakono pesomba saru kokora-kora mo'unde; aku menani ka menaniako po'unde-unde tia-Do i Ue.

⁷ Irongeomo, Ue, pebooli anu kupohaweo, Ipehohawa aku ka Isangki akumo!

⁸ Mongkona Omiu ipotae aroaku, ”Ungkeomo rupa-Ku” ka rupa-Miu ku'ungkeo, oo Ue.

⁹ Siimo Iwuniakune rupa-Miu, siimo Ipebungkuio tetenaa-Miu andio saru tekuda; Omiumo pepetulungiaku, si tadi aku ka si binta aku, oo Ue Ala anu kumadudui aku!

¹⁰ Maupo amaku ka ineku binta aku, sine Ondae i Ue tumotowo aku.

¹¹ Itisoakunemo pesalaa-Miu, oo Ue, ka Itaate akumo a mpesalaa anu merete umaropio iwaliku.

¹² Si peweengakune a mosa'ono aroado anu umewai aku, hangano mpentade iramo sakosii mpegaupi mensapoi aku, ka mia anu mpepuuriako pobobarasaia.

¹³ Menteeano, kupe'ala-alao aku kumitao moiko-Do i Ue i witado mia mentuwu!

¹⁴ Sikori Iramo i Ue! Pokorosoo ka pedatoomo aroamu! Sikori Iramo i Ue.