Po'unde-unde 26 - Wunta Mempori

Pekakai mo'ema ka Dopokomenteeo i Ue 26:1-12

¹ Inso ndi Daudi. Oo Ue, Ipokomengkaaomo nine ongkue mentee hangano tuwu akumo nahina tataano; Ndi Ondae i Ue kupompe'ala-ala nahi nanta-nanta.

² I'arahako akumo, oo Ue, ka I'ara-arahako akumo; Ipepenteeomo laro aroaku ka aroaku.

³ Hangano pompehohawa-Miu wela kongko i arono mataku, ka kutuwu a laro menteea-Miu.

⁴ Nahi kupentoro saru anu mompopo'oo, ka saru mia mo'onde-onde nahi kupebawaakono;

⁵ ku'o'aliaakono pepumpuado mia anu mpoweweu mosa'o, ka saru mia mosa'o gauno nahi kupentoro.

⁶ Kuwo'ohio kaeku tondonino nahina salaku, ka ku'amba melempa lumimbuo meda-Miu pontunua pesomba, oo Ue,

⁷ tekonai merorongeakono penani po'unde-unde anu meroku, ka tumutuluo luwuno wineweu-Miu anu kinohali-haliako.

⁸ Ue, kukekewoio raha po'ianga-Miu ka a mpo'ianga maramba-Miu ipo'ia.

⁹ Si butao penaaku meronga mia tehala, ke tuwuku meronga mia anu mo'uwu rea,

¹⁰ anu a ngkaeno metako wineweu anu tinata, ka anu kae ngkoanano montarima pompowee nahi pototono.

¹¹ Sine po'eheku aku tuwu nahina tataano; Ipotola akumo ka Ipehohawa akumo.

¹² Karuku mentade a wita anu merete; aku umunde-unde Ira i Ue a laro bawaa.