Po'unde-unde 22 - Wunta Mempori

Ue Alaku, tembio ka Ibinta aku? 22:1-32

¹ Tiano petewawado anu mpenani. Montonda unino penani: Rusa i Tempono tamo Saba Oleo. Penani po'unde-undeno i Daudi.

² Ue Alaku, Ue Alaku, tembio ka Ibinta aku? Mebooli aku, sine Omiu olai mpiha ka nahi tulungi aku.

³ Ue Alaku, ongkue meboo-booli i tempono meene, sine nahi Isangki, ka i tempono wongi, sine nahi kurodo koa mbo'u.

⁴ Kahinaano Omiumo Anu Mempori, anu mo'ia i wawono po'unde-undedo to Isaraeli.

⁵ Ndi Omiu uempu'umami dompompe'ala-ala; ondae mpompe'ala-ala, ka Omiu motola ira.

⁶ Ndi Omiu ondae mpeboo-booli, ka ondae mempinotola; ndi Omiu dompompe'ala-ala, ka nahi domemokoko'ii.

⁷ Sine ongkue andio ule-ule ka komba mia, tataado mia, dompokongkodeio mia hadio.

⁸ Luwuno anu kumita aku menggari-nggari aku, ondae mebiuo wiwido, mebitu-bituo uludo,

⁹ ”Onae mehonda ndi Ondae i Ue, po'ineemo Ondae anu motolao, po'ineeomo Ondae anu motolao, hangano onae Dopemoikoo.”

¹⁰ Omiumo anu lumuarako aku inso a mpe'anakaa; Omiumo anu weweu aku rodo a radado ineku.

¹¹ A mpo'awia-Miu ongkue pineweengakoomo mompu'u kuhina, mompu'u a laro mpe'anakaado ineku Omiumo Ue Alaku.

¹² Si olai inso ndi ongkue, hangano masusaa umpedaomo ka nahina montulungi.

¹³ Hadio sapi lakino melimbu aku; hadio bante inso i Basani kumadu aku;

¹⁴ ondae mpongangao ngangado ndi ongkue kana singa anu mingki momperangkami ka mengaoli.

¹⁵ Kana uwoi ongkue te'uwu, ka luwuno pesombuano wukuku kana tepotola; aroaku gagi kana gomo, loono a laro radaku;

¹⁶ rosoku mokari kana siba ntami, eloku metako a langiraku; ka a laro pampawu Inaa aku.

¹⁷ Hangano dahu melimbu aku, gerombolano mia mpoweweu mosa'o mengkadu aku, domeduhuo kae ka karuku.

¹⁸ Luwuno wukuku kupokodoao; ondae mpengkikita, domengkikita aku.

¹⁹ Dompetia-tiao sangkaku i olodo, ka ondae mentendeo undi a lemba meloeku.

²⁰ Sine Omiu, Ue, si olai; oo rosoku, rongamo Itulungi aku!

²¹ Ipotola akumo inso a mponai, ka penaaku inso mperorontuado dahu.

²² Ikadudui akumo inso a ngangano singa, ka inso a ntaduno bante. Sumangki Komiumo ndi ongkue!

²³ Ka ineheku tumutuluo nee-Miu a luwuno pepaekompoku ka umunde-unde Komiu i tonga-tongano bawaa:

²⁴ omiu anu doitoako Ira i Ue, unde-unde Iramo, luwuno ana'ueno i Yako, unde-unde Iramo, ka imedoitoako Iramo, hei luwuno ana'ueno i Isaraeli!

²⁵ Hangano komba Dopokongkuramao ke meruanahio marasaino mia anu tepokonsii, komba Dowunio rupa-Do a mia atuu, ka Dorongeo peboolino mepetulungi.

²⁶ Hangano Omiu ongkue menaniako po'unde-unde a laro bawaa anu langkai; tinangaku aku umowahio i arodo anu doitoako Ira.

²⁷ Mia anu marasai ta mongkaa ka mowohi, mia anu umungke Ira i Ue ta umunde-unde Ira; po'ineeomo aroamu ka imawongko mpiha!

²⁸ Luwuno tompano tolino ta mokonto'orio ka mepokule ndi Ondae i Ue; ka luwuno suku inso a luwuno tongku ira mpenggolontu mpesomba i aro-Miu.

²⁹ Hangano Ondaemo i Ue anu pabawa gagi mokole, Ondae moparenta a luwuno tongku.

³⁰ Oo, ndi Ondae ira mpenggolontu mpesomba luwuno mia mompelangka-langkai i tolino, i aro-Do ira mpenggolontu luwuno mia anu mpetii a laro pampawu, ka mia anu nahi pokotuwu mpiha.

³¹ Ka ana'ue ta mesomba ndi Ondae, a inule lembuino ira mentinutuluako mongkona Ondae i Ue.

³² Ira mempaleleo moleo-Do a tongku anu hina lembuino, hapa anu Doweweuomo i Ue.