Po'unde-unde 21 - Wunta Mempori

Penani po'unde-unde hangano ponangino mokole 21:1-14

¹ Tiano petewawado anu mpenani. Penani po'unde-undeno i Daudi.

² Ue, hangano pabawa-Miumo ka ipo'unde mokole; ka tedoa mawongko hangano ponangia anu Iweeakono!

³ Po'eheno aroano I'induakonomo ka po'emano wiwino itarimao. Sela

⁴ Hangano Omiu tumotowoakono ronso anu hadio ntu'u; Omiu monaa ramba-ramba ulu inso a wulaa mpena a wawo uluno.

⁵ I'emao tuwu inso ndi Omiu ka Omiu uminduakono, tuwu melai mpiha ka nahina tampulaano.

⁶ Langkai marambano hangano ponangia anu Iweeakono; potoro langkai ka mewanta Iweeakonomo.

⁷ Oo, Omiu weweuo ka igagi mpiha ronso; Omiu mokobukeakono mawongkoa i aro-Miu.

⁸ Hangano mokole mompe'ala-ala ndi Ondae i Ue, ka hangano pompehohawa-Do Anu Tedoa Mantande onae nahi telelu.

⁹ Kae-Miu ta rumakoo luwuno iwali-Miu; kae ngkoana-Miu ta rumako ira mia anu umo'aliaa-Komiu.

¹⁰ Komiu weweu ira kana pompotuwua api anu kolanga-langa, i tempono Ipepopokita. A laro tekuda-Do Ondae i Ue tumele ira, ka api ta kumaa ira.

¹¹ Inuledo Komiu mepate ira inso i wawontolino, ka ana'uedo inso i olodo anano mia.

¹² Tewala ira mpowawa masolaa ndi omue, ponsongka mpopopo'oo, nahi ira mempolio.

¹³ Oo, Komiu weweu ira mempolai, saru kolorono pana-Miu Ipanao rupado.

¹⁴ Ipentademo, oo Ue, a laro mpabawa-Miu! Kamimo mpenaniako ka mpenani me'unde-undeo moroso-Miu.