Po'unde-unde 20 - Wunta Mempori

Pekakai mo'ema poponangino mokole 20:1-10

¹ Tiano petewawado anu mpenani. Penani po'unde-undeno i Daudi.

² Po'ineeomo Dosangkiko i Ue i tempono ma'isoa! Po'ineeomo nee-Do Ue Alano i Yako benteiko!

³ Po'ineeomo Dopo'oliwi anu mokowaliko inso a mpo'ianga mempori ka Dotumboko inso i Sioni.

⁴ Po'ineoomo Dorambeo luwuno pesombamu, ka Dopemoikoo pesomba tinunumu. Sela

⁵ Po'ineeomo Doweeakomu hapa anu inehemu ka Dopokogagio mehasili hapa anu sinongkamu.

⁶ Kami mpebooli memawongko mongkona ponangimu ka mentande ira bandera a nee-Do Ue Alato; po'ineeomo Do'ihiio i Ue luwuno po'emamu.

⁷ Kanandio-andio kuto'orio, nine Ondae i Ue moweeakono ponangia a mia anu inurapi-Do. Inso i suruga-Do anu mempori Dosangkiakono ponangia tedoa langkai hangano kae ngkoana-Do.

⁸ Mia andio mompelangka-langkaiako kareta ka mia atuu mompelangka-langkaiako ngara, sine ontae mompelangka-langkai a nee-Do i Ue, Ue Alato.

⁹ Ondae ntebangku ka ntedonta, sine ontae mpewangu mpentade ka moleo mpiha.

¹⁰ Oo Ue, Ipoweeakonomo mokole ponangia! Isangki kamimo tempono kimpebooli!