Po'unde-unde 19 - Wunta Mempori

Maramba-Do i Ue a laro inanggano kae-Do ka a laro Songka-Do 19:1-15

¹ Tiano petewawado anu mpenani. Penani po'unde-undeno i Daudi.

² Langi tumutuluo maramba-Do Ue Ala, ka longkuno langi paleleo inanggano kae-Do;

³ oleo motilaloakono lele atuu a oleo, ka wongi mohaweo ponto'ori atuu a wongi.

⁴ Nahina lele ka nahina pau, suarado nahi teronge;

⁵ sine pe'oliwido tesiarawo i asa wawontolino, ka inanggado hawe i tompano tolino. Ondae mompasa kema i langi tiano mata'oleo,

⁶ anu meluarako kana umbungkoroi tama anu meluarako inso a bolongkono, mawongko kana pongkiari anu ta melempa.

⁷ Inso i tompano langi onae mesabaako, ka ipelempa hawe i tompano anu susua; nahina anu te'engoi inso a ntedoa mokulano.

⁸ Taura-Do i Ue atuu soompo ntu'u, mompokoroso sumanga; atora-Do i Ue atuu moroso, mompowee ponto'ori anu mentee a mia anu napi hina pinembasaino.

⁹ Parenta-Do i Ue atuu mentee, ineheno aroa; parenta-Do i Ue atuu moiko luwu, weweuo mata mewanta.

¹⁰ Doitoako Ira i Ue atuu mempori, hinao mpiha ranta nahina tampulaano; luwuno songka-Do i Ue atuu mentee, luwuno moleo,

¹¹ masuliopo olino sekono wulaa, sekono maupo hadio wulaa mpena; ka mo'ahiopo sekono siu hoani, maupo sekono siu hoani iiti inso a inenano hoani.

¹² Tetenaa-Miu mbo'u montarima pepopoto'ori inso ndi onae, mohawe tambo langkai saru me'ini ndi onae.

¹³ Isemake anu mokonto'orio sala peleluno onaeno? Ipotola akumo inso a hapa anu nahi kupokonto'orio.

¹⁴ Ikaduduiomo tetenaa-Miu inso a mpelelu mompelangka-langkai; ka si mansa onae pabawai aku! Ka ongkue gagi nahina tataaku ka tepotola inso a hala langkai.

¹⁵ Po'ineeomo pinauno ngangaku ka pine'ihilaroku Ipemoikoo, oo Ue, Torukuno Watuku ka Puu Pontolosiku.