Po'unde-unde 18 - Wunta Mempori

Penani po'unde-undeno i Daudi 18:1-51

¹ Tiano petewawado anu mpenani. Inso a ntetenaa-Do i Ue, onaemo i Daudi anu mohaweo pauno penani andio ndi Ondae i Ue, umarino Dopotolao i Ue inso a pokungkudo luwuno iwalino ka inso a ngkaeno i Saulu.

² Ipotae, ”Kupehohawa Komiu, oo Ue, rosoku!

³ Oo Ue, pongku watuku, bente pekorahakoaku ka anu kumadudui aku, Ondae Ue Alaku, torukuno watuku, po'ianga pepekaduduiaku, kantaku, tandu tekaduduiaku, kota benteku!

⁴ Mebooli aku ndi Ondae i Ue anu tekona inunde-unde, ka inso a luwuno iwaliku ongkue pinotola.

⁵ Ohono matea wewesi aku, ka moowo poropu umalu aku,

⁶ kolorono tolinodo mia mate wewesi aku, luwuno pompete'umala matea tina'o i aroku.

⁷ A laro ma'isoaku, mebooli aku ndi Ondae i Ue, ndi Ondae Ue Alaku, kupebooli mepetulungi. Inso a raha-Do Dorongeo suaraku, pebooliku mepetulungi hawe a biri-Do.

⁸ Ka i'amba leelu ka rensuomo tolino, luwuno pu'u ntorukuno mpondidi-ndidi ka telelu hangano tensila tekuda-Do.

⁹ Ahu membombo inso a enge-Do, api anu mompokomo'ai mewurosi inso a nganga-Do, waro kolanga-langa meluarako inso ndi Ondae.

¹⁰ Ondae lumongkuo langi, ka Do'amba metii, seru anu wongi-wongi kongko a ntoto ngkaru-Do.

¹¹ Ondae mesawi a ngkerubi ka Do'amba menee ka menae-naea a wawo panino angi.

¹² Ondae weweuo wongi-wongi lumimbu Ira gagi pewunia-Do, laika-Do seru wongi-wongi bukeako uwoi, oo, seru anu mokapa.

¹³ Hangano pepansarino wanta-Do luwuno seru-Do mpetonda-tonda meronga usa seru baku ka waro api.

¹⁴ Ondae i Ue merundu i langi, Anu Tedoa Mantande moporongeo suara-Do saru usa seru baku ka waro api.

¹⁵ Ondae motola ira pana-Do, onaemo ka dontesiarawo, koliki ntepoposombu, ranta ka Dopokomarisu ira.

¹⁶ Ka i'amba tengkitaomo bangano tahi, ka tesungkeomo luwuno empehino tolino hangano tekuda-Miu, oo Ue, hangano pepuurino penaa inso a enge-Miu.

¹⁷ Dodongawio inso a mpo'ianga mantande, ka umini aku, Dopadii aku inso a uwoi anu mongkokongiri.

¹⁸ Dopotola aku inso a iwaliku anu moroso ka inso a luwuno mia anu umo'aliaakune, hangano memoroso irapo lahi sekono ongkue.

¹⁹ Ondae mentowoki aku a oleo urasa'oku, sine Ondae i Ue gagi pehondaaku;

²⁰ Ondae wawa aku meluarako a mpo'ianga malua, Ondae kumadudui aku, hangano Dopemoiko aku.

²¹ Ondae i Ue weweu aku menunu saru menteeku, Ondae paguru aku menunu saru memporino kaeku.

²² Hangano ongkue tumondao mpiha pesalaa-Do i Ue ka nahi mosa'o gauku, me'olaiako inso ndi Ondae Ue Alaku.

²³ Hangano luwuno songka-Do kupekokoongakono, ka pompakosi-Do nahi kuhori moko'olaio inso ndi ongkue;

²⁴ peleluku nahina tataano i aro-Do, ka dumagaio koroiku inso a wineweu mosa'o.

²⁵ Onaemo pu'uno Ondae i Ue humuku aku menunu saru menteeku, menunu saru memporino kaeku a pongkita-Do.

²⁶ A mia anu mpetenunu Omiu metenunu, a mia anu nahina tataano Omiu nahina tataano,

²⁷ a mia anu moleo aroano Omiu moleo aroa, sine a mia anu hadio pe'akalano Omiu lalu paande.

²⁸ Omiumo anu kumadudui ira mia ntepokonsii, sine mata anu mompelangka-langkai Itotoakono.

²⁹ Omiumo anu weweuo huluku mewanta; Ondae i Ue, Ue Alaku, wantahio wongi-wongiku.

³⁰ Meronga Omiu mosia aku sumapoio sorodaduno iwali, meronga Ondae Ue Alaku mosia aku melonsokio rere watu.

³¹ Pesalaa-Do Ue Ala atuu nahina makurano; dandi-Do i Ue atuu inarahakoomo; Ondaemo kantano luwuno mia anu mpepekadudui ndi Ondae.

³² Hangano isemake Ondae Ue Ala sangkadio Ondae i Ue, ka isemake torukuno watu sangkadio Ondae Ue Alato?

³³ Ondaemo Ue Ala, Ondaemo anu umonggoakono roso tongaku ka weweuo pesalaaku nahina umonsoio;

³⁴ anu weweuo karuku kana karuno rusa ka weweu aku mentade a mpo'ingaa mantande;

³⁵ anu paguruo kaeku metea, ranta tokiaku mokolongkuo pana mala.

³⁶ Omiu weeakune kanta tekaduduia-Miu, kae ngkoana-Miu tumumbo aku, pontulungi-Miu weweu aku moroso ka mosia,

³⁷ Ipokomaluao pesalaaku, ka karuku nahi telelu.

³⁸ Kulampui ira iwaliku ranta kurako ira, ka nahi kupewolili ranta ka dometampula;

³⁹ kupirego ira, ranta nahi dompentade mbo'u; ondae ntebangku a toto ngkaruku.

⁴⁰ Tongaku I'onggoakonomo moroso ka kupetea; Omiu mokompetuunduo i totono pabawaku mia anu mentade umewai aku.

⁴¹ Iweweu ira iwaliku mpewolili mpolai inso i aroku, ka mia anu me'o'aliaakune kupepate ira.

⁴² Ondae mpebooli, sine nahina anu mongkadudui, ondae mpebooli ndi Ondae i Ue, sine nahi Dosangki ira.

⁴³ Kupirego ira kana pampawu anu pinuurino angi, mepasiako ira kana rege a nsala.

⁴⁴ Omiu motola aku inso a mpengengedo tongku; Omiu motoro aku gagi anu pabawa a luwuno tongku; tongku anu nahi kuto'ori ira gagi ataku;

⁴⁵ Mansano irongeo birido, ondae mpetenunu ndi ongkue; mia mehawe mpetuundu mensila'e aku.

⁴⁶ Mia mehawe mpondende aroado ka mpeluarako inso a bantedo saru mpondidi-ndidi.

⁴⁷ Ondae i Ue tuwu! Inunde-unde Iramo torukuno watuku, maramba Iramo Ue Ala Puu Pongkaduduiku,

⁴⁸ Ondaemo Ue Ala anu moweweuakune pombaloa, ka mokompetuundu ira tongku i totono pabawaku,

⁴⁹ Ondaemo anu motola aku inso a iwaliku. Tendeano, Omiu anu weweu aku mokopabawai ira anu mpentade umewai aku; Omiu motola aku inso a mia anu moweweu pobobarasaia.

⁵⁰ Onaemo pu'uno aku menaniako po'unde-unde umunde-unde Komiu i olodo luwuno tongku, oo Ue, ka menaniako penani umunde-undeo nee-Miu.

⁵¹ Ondae moweeakono luwuno ponangia langkai ndi mokole anu pinotoro-Do, ka mopokitao pompehohawa a mia anu inurapi-Do, ndi Daudi ka inuleno anu nahina tampulaano.”