Po'unde-unde 17 - Wunta Mempori

Linampui maupo nahina salano 17:1-15

¹ Pekakaino i Daudi. Irongeomo, Ue, kara-kara anu mentee, Ipekokoongakonomo suaraku; Irongeomo pekakaiku, inso a wiwi anu nahi pompopo'oo.

² Po'ineeomo insomo ndi Omiu ihawe pobitaraa; po'ineeomo mata-Miu kumitao hapa anu mentee.

³ Tewala Omiu umarahakono aroaku, paresao i tempono wongi, ka mepentee aku, nahi Komiu mohawe hapa-hapa; pinewowolo mosa'o nahi haweako meluarako inso a wiwiku,

⁴ kana anu wela wineweudo mia. Menunu saru pau anu pinau-Miu, kudagaiomo koroiku a mpesalaado mia anu mpoweweu pobobarasaia;

⁵ pelempaku tumondao mpiha pesalaa-Miu, karuku nahi telelu.

⁶ Mebooli aku ndi Omiu hangano Omiu sumangki aku, oo Ue Ala; Ipo'aroomo biri-Miu ndi ongkue, Irongeomo pinauku.

⁷ Ipopokitaomo pompehohawa-Miu anu kinohali-haliako, oo Puu Pongkadudui a mia anu mo'ungke pepekaduduia inso a luwuno mia mpe'ewa anu umewaio pabawa-Miu.

⁸ Ipekaria akumo kana ihi mata-Miu, wuni akumo a laro pe'egoano pani-Miu

⁹ inso a mia mosa'o gauno anu bobarasai aku, ka inso anu kumadu aku ta umoninio penaaku.

¹⁰ Aroado tetondo a mpe'aroa mompehohawa, ondae melaba mpau;

¹¹ Ondae mentondario pelempaku, kanandio-andio domelimbu aku, matado pino'aro ira mpepasiakune a wita.

¹² Rupado kana singa anu po'eheno ta momperangkami, kana singa mongura anu mompora a mpo'ianga anu tewuni.

¹³ Ipentademo, Ue, I'aropi iramo ka pobangku iramo, saru ponai-Miu Ipotola akumo inso a mia mosa'o gauno.

¹⁴ Ipingko iramo, oo Ue, saru kae-Miu, Ipingko iramo inso i tolino, ka si dompohawe tia i olodo mia anu mentuwu, kompodo po'ineeomo ka ibukeako hapa anu ninaa-Miu, ranta luwuno anado gagi menteende, ka toreano domebintao tiado luwuno nana'ote kodeido.

¹⁵ Sine ongkue, a laro menteea aku kumitao rupa-Miu, ka i tempono kupewangu aku gagi teendeako rupa-Miu.