Po'unde-unde 16 - Wunta Mempori

Me'uraano mia moleo 16:1-11

¹ Mikitami. Inso ndi Daudi. Idagai akumo, oo Ue Ala, hangano ndi Omiu kupepekadudui.

² Mepau aku ndi Ondae i Ue, ”Omiumo Ueku; Omiumo me'uraaku, nahina anu lumaloi Komiu!”

³ Luwuno mia mempori anu kongko i wita andio, ondaemo mia mempinelangkai anu wela gagi ku'ineheakono.

⁴ Tetiangi langkai pompemasusado mia anu tumonda ira pinesombai susua; nahi aku metonda mompesombaako rea inso a mpesomba tinawado, ka nahi aku wela pauo a wiwiku needo pinesombaido.

⁵ Oo Ue, Omiumo tia pusakaku ka pialaku, Omiumo anu uminio tiaku anu inundi.

⁶ Koloro posongka tedonta tiaku a luwuno po'ianga anu tekosi; oo, tia pusakaku mokonsanaao aroaku.

⁷ Ku'umunde-unde Ira i Ue, anu patudu akumo, oo, i tempono wongi laro aroaku paguru aku.

⁸ Wela aku tuwu tepo'aro saru Ondae i Ue; hangano Ondae mentade i koanaku, nahi aku telelu.

⁹ Onaemo pu'uno aroaku mo'unde ka tompaano sumangaku meboo-booli, koroiku ta mo'ia momperodo;

¹⁰ hangano Omiu nahi peweengakune a ntolinodo mia mate, ka nahi po'ineeo mia mempori-Miu mongkita matea.

¹¹ Omiu pauakune sala ntuwua; i aro-Miu hinao mawongkoa anu hadio ntu'u, a ngkae koana-Miu hinao mpiha momoikoa.