Po'unde-unde 147 - Wunta Mempori

Pabawa ka pande-Do i Ue mosongka 147:1-20

¹ Haleluya! Moiko ntu'u menani umunde-unde Ira Ue Alato, tekosi ntu'u menaniako penani po'unde-unde.

² Ondae i Ue wanguo Yerusale, Dopumpu ira to Isaraeli anu ntesiarawo;

³ Dotareroo aroano mia anu masusa aroano ka waluako ira mobelado;

⁴ Ondae tumantuio hadiono anano wula ka pauo neeno nte'o'asa.

⁵ Langkai pabawa-Do Ueto ka tedoa Ira moroso, pande-Do mosongka nahina tompaano.

⁶ Ondae i Ue wali mokorosoo mia anu tepokonsii, sine mia mosa'o gauno pinotii hawe a wita.

⁷ Penaniakomo penani po'unde-unde tia-Do i Ue, penanimo po'unde-undeako katapi tia-Do Ue Alato!

⁸ Ondaemo anu tumutuwiakono seru langi, anu mompatinda usa tiano tolino, ka weweu ira torukuno ka ituwu ewo.

⁹ Ondaemo anu moweeako ira kaanga pinotuwu, a anano manu-manu paa-paa anu mompiu-piu.

¹⁰ Komba inehe-Do montamano ngara mpetea, nahi Dopemoikoo rosono karuno tama;

¹¹ Ondae i Ue memoikoo mia anu doitoako Ira, a mia anu momperorohi a pompehohawa-Do.

¹² Pelangkai Iramo i Ue, hei Yerusale, unde-unde Iramo Ue Alamu, hei Sioni!

¹³ Hangano, Dopokorosoo lansono pewowa langkaimu, ka rumonso ira anamu anu mekongko i olomu.

¹⁴ Dopoweeakono manangaia a witamu ka mokomowohiakomu gandu anu lalu moiko.

¹⁵ Dopotiio dandi-Do i tolino; sarai koa pau-Do ipelulu.

¹⁶ Dopotiio seru baku kana wulu bimba ka rumawoo tontoru baku kana awu.

¹⁷ Dopetadiakono usa seru baku kana one molaba. Isemake anu mokompeteao morinino laromeene-Do?

¹⁸ Do'oliwio pau-Do, ka i'amba loono luwuno, Dopepuuriakono angi-Do, ka i'amba waa uwoi.

¹⁹ Dopohaweo pau-Do ndi Yako, luwuno pompakosi-Do ka songka-Do a nto Isaraeli.

²⁰ Nahi Dopoweweu kanandio a luwuno tongku, ka luwuno songka-Do nahi domento'orio. Haleluya!