Po'unde-unde 146 - Wunta Mempori

Ondae i Ue moparenta ranta nahina tampulaano

¹ Haleluya! Unde-unde Iramo i Ue, hei sumangaku!

² Akumo melangkai Ira i Ue asa ntinuwuku, ka menani umunde-unde Ira Ue Alaku tempono da kongko aku.

³ Si mpe'ala-ala ira ulea mokole, a anano mia anu nahi polio mongkadudui.

⁴ Tewala tampula penaano, onae mekule a wita; a oleo koa mbo'u atuu tampulaomo luwuno sinongkano.

⁵ Me'uraomo mia anu montarima pontulungi inso ndi Ondae Ue Alano i Yako, anu pomperorohiano ndi Ondae i Ue, Ue Alano:

⁶ Ondae anu mokogagio langi ka tolino, tahi ka luwuno ihino; anu nahi bali petenunu-Do ranta nahina tampulaano,

⁷ anu umalaakono mia anu tepokonsii, anu mompowee kaanga a mia anu mokoninggo. Ondae i Ue motolao mia anu te'uko,

⁸ Ondae i Ue umungkahio matano mia anu morawu, Ondae i Ue mokomorosoo mia anu tetuundu telusa, Ondae i Ue mehohawao mia mentee.

⁹ Ondae i Ue dumagai ira mia mehawe, nana'ote nahina amano ka tuwu beine Dowali mokoroso ira, sine pesalaano mia mosa'o gauno Dopokogagio.

¹⁰ Ondae i Ue moparenta ranta nahina tampulaano, Ue Alamu, oo Sioni, mapa'api-api inule! Haleluya!