Po'unde-unde 145 - Wunta Mempori

Po'unde-unde a langkaino pabawa ka moiko-Do i Ue 145:1-21

¹ Po'unde-unde inso ndi Daudi. Aku melangkai Komiu, oo Ue Alaku, oo Mokole, ka aku umunde-undeo mpiha nee-Miu ranta nahina tampulaano.

² Sompo oleo aku umunde-unde Komiu, ka melangkaio mpiha nee-Miu ranta nahina tampulaano.

³ Langkai pabawa-Miu ka tedoa inunde-unde, ka langkaino pabawa-Do nahi pinokohawe laro.

⁴ Mapa'api-api inule ta pinelangkai luwuno inangga-Miu ka ira mempaleleo langkaino roso-Miu.

⁵ Maramba-Miu anu langkai ta mewanta ka luwuno wineweu-Miu anu kinohali-haliako aku menaniakono.

⁶ Luwuno wineweu-Miu anu mongkokongiri ta pinalele ka langkaino pabawa-Miu aku tumutuluo.

⁷ Pepopoto'ori a mpoweweu-Miu moiko anu langkai ta pinalele ka ira mengkokora-kora memawongkoakono moleo-Miu.

⁸ Ondae i Ue atuu me'aroa ka mompehohawa, tedoa sabara ka langkai pompehohawa-Do.

⁹ Ondae i Ue atuu moiko a luwuno mia, ka mehohawao luwuno anu pinokogagi-Do.

¹⁰ Luwuno anu pinokogagi-Miu ira mpontarimakasi ndi Omiu, oo Ue, ka luwuno mia anu pinehohawa-Miu ira me'unde-unde Komiu.

¹¹ Ira mempaleleo poparentaa-Miu anu maramba, ka ira mempopauo langkaino roso-Miu,

¹² ka domempauako ira luwuno anano mia langkaino roso-Miu, ka poparentaa-Miu anu maramba ka mewanta.

¹³ Poparentaa-Miu onaemo poparentaa ranta tampulaano wawontolino, ka poparentaa-Miu nahi bali a luwuno inule. Ondae i Ue atuu Do'ihiio luwuno pinau-Do ka buke pompehohawa a luwuno wineweu-Do.

¹⁴ Ondae i Ue atuu tumbodo mia anu tedonta ka mokorosoo luwuno mia anu tetuundu telusa.

¹⁵ Matano luwuno anu tuwu sumikori Komiu, ka Ipoweeako ira kaanga a tempono;

¹⁶ Omiu anu wileo kae-Miu ka mokosompoo kineredo luwuno anu tuwu.

¹⁷ Ondae i Ue atuu moleo a luwuno poweweu-Do ka buke pompehohawa a luwuno wineweu-Do.

¹⁸ Ondae i Ue umpeda a sompo mia anu mebooli ndi Ondae, a sompo mia anu metenunu mebooli ndi Ondae.

¹⁹ Ondae umihiio po'eheno mia anu doitoako Ira, merorongeakono peraalido mpepetulungi ka kumadudui ira.

²⁰ Ondae i Ue dumagaio luwuno mia anu pinehohawa-Do, sine luwuno mia mosa'o gauno Dopepate ira.

²¹ Ngangaku ta mompau po'unde-unde ndi Ondae i Ue ka po'ineeomo luwuno anu tuwu umunde-undeo nee-Do anu mempori ranta nahina tampulaano.