Po'unde-unde 144 - Wunta Mempori

Po'emano mokole mo'aropi peteaa

¹ Inso ndi Daudi. Inunde-unde Iramo i Ue, torukuno watuku, anu paguruo kaeku metea, ka wunga ngkaeku metea.

² Ondaemo pe'asaku anu metenunu ka bente pekorahakoaku, kota benteku ka anu kumadudui aku, kantaku ka po'ianga pepetulungiaku, anu mokompetuundu ira luwuno tongku i totono pabawaku!

³ Oo Ue, hapake mia atuu, ranta ka Iperioo, ka anano mia, ranta ka Iperorohio?

⁴ Mia mengkena kana angi anu mepuuri, luwuno oleo ntuwuno kana eo-eo anu telalo.

⁵ Oo Ue, Ilongkuomo langi-Miu ka Ipetiimo, Idanggi iramo torukuno, ranta ka ime'ahu!

⁶ Ipesembiako iramo koliki ka Isiarawo iramo, Ipotola iramo pana-Miu ka Isiarawo iramo!

⁷ Itasiomo kae-Miu inso a mantandeano, Ipokomalua akumo ka Ipotola aku inso a moowo anu mongkokongiri, inso a pokungkuno mia hawe.

⁸ Ngangado mpompau pegaupi ka kae ngkoanado mpesumpa nahi mentee.

⁹ Oo Ue Ala, aku menaniako-Miu penani wo'ohu, saru gambusu hopulu kolorono aku menani umunde-undea-Komiu,

¹⁰ Omiu anu moweeakono ponangia a luwuno mokole, ka motolao i Daudi, tetenaa-Miu!

¹¹ Ipotola akumo inso a mponai masolaa ka Ipotola akumo inso a pokungkuno mia hawe. Ngangado mpompau pegaupi ka kae ngkoanado mpesumpa nahi mentee.

¹² Po'ineeomo nana'ote ntamato kana pinopaho anu tuwu mewalo tempono i mongura, ka nana'ote beineto kana luwuno karuno siuno, anu pina'o tiano langkanae winangu!

¹³ Po'ineeomo luwuno godato bukeako mperupa-rupa hasilino usahato; bawaano bembe bimbato gagi sowu-sowuno, tendeano pulu nsowu a ntonga mpadato!

¹⁴ Po'ineeomo sapito ka domemewalo; nahina mbo'u haki lele ka anu tewunsuli, nahina peraali a luwuno tanalapato!

¹⁵ Me'uraomo tongku anu kanatuu teweweuno! Me'uraomo tongku anu Ue Alano onaemo Ondae Ue!