Po'unde-unde 143 - Wunta Mempori

Pekakai mo'ema pontulungi ka pompaguru 143:1-12

¹ Penani po'unde-undeno i Daudi. Oo Ue, Irongeomo pekakaiku, Irongeomo po'emaku! Isangki akumo a laro pompehohawa ka moleo-Miu!

² Si pekara-karaakono tetenaa-Miu, hangano i olodo anu mentuwu, nahina maupo te'asa mia mentee i aro-Miu.

³ Hangano domelampui akumo iwali ka mpepasiakono tuwuku a wita, menaa aku a laro wongi-wongi kana mia anu tehineomo imate.

⁴ Rosoku molema telusa a laro ngkoroiku, aroaku tedoa penonso.

⁵ Kurambeo luwuno oleo anu telaloomo, kuwela mewuao luwuno wineweu-Miu, kupenootio wineweuno kae-Miu.

⁶ Kusineo kaeku ndi Omiu, sumangaku mokoranga ndi Omiu kana wita anu londa. Sela

⁷ Rongamo Isangki aku, oo Ue, pingkoomo rosoku! Si wuniakune rupa-Miu, ranta ka kugagi kana ondae anu mpetii a ngkekeno kaburu.

⁸ Ipoporongeomo pompehohawa-Miu ndi ongkue i tempono mo'oru, hangano ndi Omiumo kupompe'ala-ala! Ipauakunemo pesalaa anu asalakono kutondao, hangano ndi Omiumo kutandeo sumangaku.

⁹ Ipotola akumo inso a luwuno iwaliku, oo Ue, ndi Omiumo kupepekadudui!

¹⁰ Ipaguru akumo weweuo po'ehe-Miu, hangano Omiumo Ue Alaku! Po'ineeomo Penaa-Miu anu moiko atuu tumaate aku a wita anu merete!

¹¹ A nee-Miu, Ikadudui akumo, oo Ue, Iluarakoomo sumangaku inso a laro ma'isoa a moleo-Miu!

¹² Ipepate iramo iwaliku hangano pompehohawa-Miu, ka Ipokotampulaomo luwuno mia anu medadai aku, hangano ongkue tetenaa-Miu!