Po'unde-unde 142 - Wunta Mempori

Pekakaino asa mia anu linolampui

¹ Penani pompaguruno i Daudi, tempono onae a laro ngkunepo. Pekakai.

² Meboo-booli aku meroku ndi Ondae i Ue, meroku kupo'ema pompehohawa ndi Ondae i Ue.

³ Kupohaweo pinemasusaku i aro-Do, pompema'isoku kupauako Ira i aro-Do.

⁴ Tempono rosoku molema telusa a laro ngkoroiku, Omiumo anu tumo'orio pesalaaku. A nsala anu asalakono kutondao, dompota'oakune oho.

⁵ Pengkitamo i koana ka kitaomo, nahina maupo te'asa mia anu merio aku; polaiaku tetadiomo, nahina maupo te'asa mia anu merio aku.

⁶ Meboo-booli aku ndi omiu, oo Ue, kupotae, ”Omiumo pepekaduduiaku, tiaku i witado mia mentuwu!”

⁷ Iperioomo pebooliku, hangano tedoa akumo molema. Ipotola akumo inso a mia anu lumampui aku, hangano memoroso irapo sekono ongkue.

⁸ Iluarako akumo inso a laro torungku ka ku'unde-undeo nee-Miu. Luwuno mia mentee ira melimbu aku, hangano Omiu moweweu moiko ndi ongkue.