Po'unde-unde 139 - Wunta Mempori

Pekakai ndi Ondae Ue Ala anu tumo'orio luwu 139:1-24

¹ Tiano petewawado anu mpenani. Penani po'unde-undeno i Daudi. Ue, Omiu momparesa ka tumo'ori aku;

² Omiu tumo'orio tempono kupentoro ke mentade, Omiu mokonto'orio pinewowoloku inso olai.

³ Omiu mekokoongakune tempono kupelempa ke mepombole, luwuno pesalaaku Ito'orio.

⁴ Hangano eloku napi poluarako pau, menteeano, luwuno Ito'oriomo, oo Ue.

⁵ Inso i bungkuno ka inso i arono Omiu wala aku, ka Inaao kae-Miu i wawoku.

⁶ Tedoa kukohali-haliakono ponto'ori atuu, mantande lahi, nahi kupolio humaweo.

⁷ Isua kupokolako olaiakono penaa-Miu, isua kupokompolai inso i aro-Miu?

⁸ Tewala mewuatako aku i langi, Omiu kongko i ra'ai; tewala kunaao poturiaku a tolinodo mia mate, Omiu mbo'u kongko i tu'ai.

⁹ Tewala kupeneeako panino towea, ka moweweu po'ianga i tompano tahi,

¹⁰ i ra'ai mbo'u kae-Miu ta tumaate aku, ka kae ngkoana-Miu umini aku.

¹¹ Tewala kupotae, ”Po'ineeomo koa ka itutuwi aku wongi-wongi, ka mewine anu lumimbu aku gagi wongi,”

¹² ka wongi-wongi mbo'u komba Ipewongi-wongio, ka wongi gagi mewine kana meene; wongi-wongia mengkena kana meene.

¹³ Menteeano, Omiumo anu weweuo wua horiku, weweu aku a laro mpe'anakaado ineku.

¹⁴ Montarimakasi aku ndi Omiu hangano ongkue pinokogagi montonda rupa-Miu; kinohali-haliako hapa anu wineweu-Miu, ka ito'orio ntu'u sumangaku.

¹⁵ Luwuno wukuku nahi te'egoi inso a pongkita-Miu, tempono kupinokogagi a mpo'ianga anu tewuni, iwineweu a ntia-tiano tolino anu i totono ntu'u;

¹⁶ mata-Miu kumita aku tempono da a laro mpe'anakaa, ka a wunta-Miu luwuno teburiomo, luwuno oleo anu pinokogagiomo, se'eluno napi hina maupo te'asa oleo.

¹⁷ Kupemotungkoo ntu'u pinewowolo-Miu, oo Ue Ala! Tedoa ntu'u hadio!

¹⁸ Tewala aku dumoao, hadioopo atuu sekonopo one. Tempono kupenaa-naa, mengkaa ongkue da saru Omiu.

¹⁹ Po'ineeomo ka ipepateo mia mosa'o gauno, oo Ue Ala! Ime'olaimo inso ndi ongkue, hei luwuno anu mpo'uwu rea!

²⁰ Ondae mpompau pegaupi mongkona Omiu, ka nahina tuduno umewai Komiu.

²¹ Nde kana'umpe ka nahi aku umo'aliaakono mia anu umo'aliaa-Komiu, oo Ue, ka nahi aku te'osaakono mia anu mentade umewai Komiu?

²² Tedoa ku'o'aliaako ira, ondae gagi iwaliku.

²³ Iparesa akumo, oo Ue Ala, ka Ito'oriomo aroaku, I'arahakunemo ka Ito'oriomo luwuno pinewowoloku;

²⁴ Ikitaomo, ba mansa nahi mentee pesalaaku, ka Itaate akumo a nsala anu nahina tampulaano!