Po'unde-unde 138 - Wunta Mempori

Penani pontarimakasi a pompema'isoa 138:1-8

¹ Inso ndi Daudi. Aku montarimakasi ndi Omiu tompaano aroaku, ka menani umunde-unde Komiu i arono pinesombaido luwuno tongku.

² Aku menggolontu mesomba te'aro a raha-Miu anu mempori ka umunde-undeo nee-Miu, hangano pompehohawa-Miu; hangano Iweweuo nee-Miu ka dandi-Miu lumaloio luwuakoano.

³ A oleo kupebooli, Isangki aku ka tumiangio roso a laro sumangaku.

⁴ Po'ineeomo luwuno mokole i tolino mpontarimakasi ndi Omiu, oo Ue, hangano domerongeomo dandi inso a nganga-Miu;

⁵ po'ineeomo dompenani mongkona luwuno pesalaa-Do i Ue, hangano Ondae i Ue maramba ntu'u.

⁶ Ondae i Ue atuu mantande, sine Dopensiroio mia anu pinokongkodei, mia anu mompelangka-langkai Doto'orio inso olai.

⁷ Maupo kupelempa a laro ma'isoa, Omiu kumaduduio tuwuku inso a ntekudado iwaliku; Iweroo kae-Miu, ka kae ngkoana-Miu kumadudui aku.

⁸ Ondae i Ue Ira moko'umariakune luwuakoano! Oo Ue, pompehohawa-Miu nahi bali ranta nahina tampulaano; si bintao wineweuno kae-Miu!