Po'unde-unde 135 - Wunta Mempori

Butu Ondae i Ue anu tekona pinesombai 135:1-21

¹ Haleluya! Unde-undeomo nee-Do i Ue, unde-undeomo, hei luwuno tetenaa-Do i Ue,

² hei luwuno mia anu mpopekakaako a Raha-Do i Ue, a kintalano Raha-Do Ue Alato!

³ Unde-unde Iramo i Ue, hangano Ondae i Ue atuu moiko Ira, Penanimo po'unde-unde tiano nee-Do, hangano nee atuu tekosi!

⁴ Hangano, Ondae i Ue Dobinikiomo i Yako tia-Do, to Isaraeli gagi mia-Do anu pinehohawa-Do.

⁵ Kuto'orio nine Ondae i Ue atuu tedoa langkai pabawa-Do ka Ondae Ueto lumaloio luwuno pinesombai.

⁶ Ondae i Ue Doweweuo hapa anu inehe-Do, i langi ka i tolino, a ntahi ka a luwuno wingke ondalo;

⁷ Dowuatakono gawu inso i tompano tolino, mepansariako koliki tumondao usa, Dowawao angi meluarako inso a mponaapa-Do.

⁸ Ondaemo anu tumunduhi ira ka domemate ana aka i Masiri, moiko mia maupo pinotuwu,

⁹ ka mokohina ira petondoni ka luwuno kinohali-haliako i tonga-tongamu, hei Masiri, umewaio i Pirao ka luwuno pegawaino.

¹⁰ Ondaemo anu numangi ira hadio tongku, ka mepate ira luwuno mokole anu moroso:

¹¹ I Sihoni, mokoledo to Amori, ka i Ogo, mokole i wita Basani, saru luwuno poparentaa i Kana'a.

¹² Doweeako ira witado gagi tia pusaka, tia pusaka a nto Isaraeli, bawaa-Do.

¹³ Oo Ue, nee-Miu nahi bali ranta nahina tampulaano; oo Ue, Omiu rinambe mapa'api-api inule.

¹⁴ Hangano, Ondae i Ue moweeako ira moleoa a bawaa-Do, ka mehohawa ira tetenaa-Do.

¹⁵ Lahumoado luwuno tongku butu koa salaka ka wulaa, wineweuno kaeno mia,

¹⁶ hinao ngangano, sine nahi pokompepau, hinao matano, sine nahi pokompongkita,

¹⁷ hinao birino, sine nahi pokomporonge, penaa mbo'u nahina a laro ngangado.

¹⁸ Ondae anu meweweuo ira megagi mpengkena kanatuu, kanatuu koa mbo'u luwuno mia anu mpe'ala-alao.

¹⁹ Hei suku Isaraeli, unde-unde Iramo i Ue! Hei suku Haruni, unde-unde Iramo i Ue!

²⁰ Hei suku Lewi, unde-unde Iramo i Ue! Hei luwuno mia anu doitoako Ira i Ue, ime'unde-unde Iramo i Ue!

²¹ Unde-unde Iramo i Ue inso i Sioni, Ondae anu mo'ia i Yerusale! Haleluya!