Po'unde-unde 132 - Wunta Mempori

I Daudi ka Sioni, bininiki-Do i Ue 132:1-18

¹ Penani mekoho. Irambeomo, oo Ue, i Daudi ka luwuno pe'iseino,

² kana'umpe onae mesumpaomo ndi Ondae i Ue, montangaomo ndi Ondae Anu Tedoa Moroso, Ue Alano i Yako,

³ ”Menteeano nahi aku mewinso a laro ngkema po'iangaku, nahi aku mepombole a dasa pepomboleaku,

⁴ menteeano nahi aku mo'ineeo mataku tekoturi ke tango mataku tekoturi rodo,

⁵ ranta ka kupohawe po'ianga-Do i Ue, po'ianga-Do Anu Tedoa Moroso, Ue Alano i Yako.”

⁶ Mentee ntu'u tomerongeo nine burua pedandia atuu kongko i Eparata, tomehaweo i pada Ya'ari.

⁷ ”Aiwa ka tomelako a mpo'ianga-Do, mpenggolontu mpesomba a empehino karu-Do.”

⁸ Ipewangumo, oo Ue, ka Ilakomo a mpo'ianga-Miu, Omiu saru burua pedandia roso-Miu!

⁹ Po'ineeomo luwuno sando mpesomba-Miu mpesangka menteea, ka mengkokora-kora memawongko mia anu pinehohawa-Miu!

¹⁰ Hangano i Daudi, tetenaa-Miu, Itarima iramo mia anu inurapi-Miu!

¹¹ Ondae i Ue mesumpa Iramo ndi Daudi, nahi Ira humapuo, ”Asa mia ana ngkoroimu Aku montoroo a wawo ngkadera poparentaamu;

¹² tewala luwuno anamu mpe'ini a mpedandia-Ku, ka a luwuno atora-Ku anu Kupaguruako ira, asalakono luwuno anado ranta nahina tampulaano ira mpentoro a wawo ngkadera poparentaamu.”

¹³ Hangano Dobinikiomo i Ue Sioni, inehe-Do gagi po'ianga-Do,

¹⁴ ”Ndiomo po'ianga-Ku ranta nahina tampulaano, i ndi'ai Kupo'ia, hangano inehe-Ku.

¹⁵ Pepatindaa kaangano Aku rumonsoo tehadio ntu'u, miano anu memongkokolaro Aku mokomowohiako ira kaanga,

¹⁶ luwuno sando mpesombano Aku mokonaako ira sangka tekaduduia, ka luwuno miano anu moleo mengkokora-kora mpo'unde ka memawongko.

¹⁷ I ra'aimo Aku motuwuo asa tandu rosono i Daudi, Aku patindao asa hulu tiano mia anu inurapi-Ku.

¹⁸ Luwuno iwalino Aku mokonaako ira sangka pompokongkodei, sine a wawo uluno ta mewanta ramba-ramba uluno.”