Po'unde-unde 119 - Wunta Mempori

Me'urano mia anu tuwu montonda Taura-Do i Ue 119:1-176

¹ Me'uraomo mia anu tuwuno nahina tataano, anu tuwu montonda Taura-Do i Ue.

² Me'uraomo mia anu uminio luwuno pepopoto'ori-Do, anu umungke Ira tompaano aroano.

³ Ondae nahi dompoweweu anu mosa'o, sine tuwu mentondao luwuno pesalaa-Do.

⁴ Omiumo anu mohaweo luwuno parenta-Miu, kai inini tementee ntu'u.

⁵ Po'ineeomo ka imoroso luwuno pesalaaku i larono kupe'ini a pompakosi-Miu!

⁶ Nahi aku pinokoko'ii, tewala kupepenteeo luwuno parenta-Miu.

⁷ Aku montarimakasi ndi Omiu a moputeno aroa, tewala kupepaguruakono luwuno songka-Miu anu moleo.

⁸ Aku me'ini a luwuno pompakosi-Miu, osi'i ntu'u Ibinta aku.

⁹ Kana'umpe idagaio mia mongura peleluno ka si hina tataano? Saru me'ini a mpau-Miu.

¹⁰ Tompaano aroaku ku'ungke Komiu, si po'inee aku pansia inso a luwuno parenta-Miu.

¹¹ Dandi-Miu kunaao i laro aroaku, ka si kutehala ndi Omiu.

¹² Inunde-unde Komiumo, oo Ue; Ipaguruakunemo luwuno pompakosi-Miu.

¹³ Saru wiwiku kupopowali-walio luwuno songka anu pinau-Miu.

¹⁴ Mawongko aku tumondao luwuno pompakosi-Miu, laluaopo sekono mompe'ue luwuno arataa.

¹⁵ Aku mepaguruakono luwuno parenta-Miu ka mekokoongakono luwuno pesalaa-Miu.

¹⁶ Ku'ineheakono luwuno pompakosi-Miu, pau-Miu nahi aku kumolupeo.

¹⁷ Iweweuomo anu moiko a ntetenaa-Miu andio, ka kutuwu, ka me'ini a mpau-Miu.

¹⁸ I'ungkahiomo mata-Miu ka kukitao luwuno anu kinohali-haliako inso a Songka-Miu.

¹⁹ Ongkue andio butu mia hawe i tolino, siimo Iwuniakune luwuno parenta-Miu.

²⁰ Masusa aroaku hangano tekewoi a luwuno songka-Miu sompo tempo.

²¹ Omiu wuraraio mia mompelangka-langkai, mia tetotonaa anu pansia inso a luwuno parenta-Miu.

²² Ipoko'olaiomo pontata ka pompokongkodei inso ndi ongkue, hangano ongkue uminio luwuno pepopoto'ori-Miu.

²³ Maupo luwuno mia pinemota'u mpentoro ntepo'asa umewai aku, tetenaa-Miu kongkono menootio luwuno pompakosi-Miu.

²⁴ Oo, luwuno pepoto'ori-Miu gagi ku'ineheakono, gagi luwuno anu patudu aku.

²⁵ Sumangaku tebangku a laro pampawu, ipotuwu akumo menunu saru pau-Miu.

²⁶ Luwuno sala ntumuwuku kututuluo ka Isangki aku, Ipaguruakunemo luwuno pompakosi-Miu.

²⁷ Iweweu akumo mokonto'orio pontisono luwuno parenta-Miu, ka kupenootio luwuno wineweu-Miu anu kinohali-haliako.

²⁸ Weera uwoi mataku hangano masusa, Ipokoroso akumo menunu saru pau-Miu.

²⁹ Ipoko'olaiomo sala mpegaupi inso ndi ongkue, ka Iweeakunemo Songka-Miu.

³⁰ Mobiniki aku sala menteea, luwuno songka-Miu kunaaomo i aroku.

³¹ Me'ini aku moroso a luwuno pepopoto'ori-Miu, oo Ue, si po'inee aku pinokoko'ii.

³² Aku melulu tumondao luwuno parenta-Miu, hangano Ipokonsanaao aroaku.

³³ Ipaguruakunemo pengkonaano luwuno pompakosi-Miu, oo Ue, aku uminio hawe pokotompaano tempo.

³⁴ Iwee akumo ponto'ori, ka kupe'ini a Songka-Miu; aku mekariao tompaano aroaku.

³⁵ Iwawa akumo a nsala tumondao luwuno parenta-Miu, hangano ineheku.

³⁶ Ipo'aroomo aroaku a luwuno pepopoto'ori-Miu, ka osi'i a modokoa.

³⁷ Ilimbaomo pengkitaku inso a hapa anu nahina tuduno, Iweweu akumo tuwu a mpo'ehe-Miu!

³⁸ I'ihiiomo dandi-Miu a ntetenaa-Miu anu Iweeakono mia anu doito ndi Omiu.

³⁹ Ipoko'olaiomo pontata anu kudoitoakono, hangano luwuno songka-Miu atuu moiko.

⁴⁰ Mentee ntu'u kukekewoio luwuno parenta-Miu, Iweweu akumo tuwu a moleo-Miu.

⁴¹ Po'ineeomo pompehohawa-Miu ka ihawe ndi ongkue, oo Ue, pongkadudui-Miu menunu saru dandi-Miu,

⁴² ka kupolio sumangkio mia anu tumata aku, hangano kupe'ala-alao pau-Miu.

⁴³ Po'ineeomo ka ipo'ia mpiha pau menteea-Miu a ngangaku, hangano ongkue momperorohi a luwuno songka-Miu.

⁴⁴ Aku me'ini mpiha a Songka-Miu, ranta nahina tampulaano.

⁴⁵ Aku bebasi melempa, hangano ku'ungkeo luwuno parenta-Miu.

⁴⁶ Aku mepau mongkona luwuno pepopoto'ori-Miu i arodo luwuno mokole, ka nahi aku mokoko'ii.

⁴⁷ Ku'ineheakono luwuno parenta-Miu anu lano kukekewoio.

⁴⁸ Kutineo kaeku a luwuno parenta-Miu anu kinekewoiku, ka menootio luwuno pompakosi-Miu.

⁴⁹ Irambeomo pau anu pinau-Miu a ntetenaa-Miu, hangano onae Iweweu aku momperorohi.

⁵⁰ Ndiomo pontareroku a laro marasaiku, nine dandi-Miu moweeakune tuwua.

⁵¹ Lansara ntu'u ipopodeu-deu aku mia mompelangka-langkai, sine nahi kupansia inso a Songka-Miu.

⁵² Tewala kurambeo luwuno songka-Miu anu inso i ndi'ipua se'eluno, ka tetarero akumo, oo Ue.

⁵³ Ipabawai aku bamburua a luwuno mia anu mosa'o gauno, anu bintao Songka-Miu.

⁵⁴ Luwuno pompakosi-Miu gagi penani po'unde-undeku i tolino anu kupo'iangario kana mia hawe.

⁵⁵ I tempono wongi kurambeo nee-Miu, oo Ue; aku me'ini a Songka-Miu.

⁵⁶ Ndiomo anu hinaweku: Ku'inio luwuno parenta-Miu.

⁵⁷ Ondaemo i Ue tiaku, medandi aku me'ini a luwuno pau-Miu.

⁵⁸ Tompaano aroaku ku'emao pompehohawa-Miu, Ipehohawa akumo menunu saru dandi-Miu.

⁵⁹ Kupewowoloomo luwuno sala ntumuwuku, ka melempaakono karuku mepokule a luwuno pepopoto'ori-Miu.

⁶⁰ Montuturako aku ka nahi kupe'ara-arai me'ini a luwuno parenta-Miu.

⁶¹ Luwuno kolorodo mia mosa'o gauno wewesi aku, sine Songka-Miu nahi kukolupeo.

⁶² Ntonga wongi kupewangu ka montarimakasi ndi Omiu hangano luwuno songka-Miu anu moleo.

⁶³ Gagi aku wali-walido luwuno mia anu doitoa-Komiu, ka mia anu me'ini a luwuno parenta-Miu.

⁶⁴ Tolino bukeako pompehohawa-Miu, oo Ue, Ipaguruakunemo luwuno pompakosi-Miu.

⁶⁵ Moweweu Komiumo moiko a ntetenaa-Miu, menunu saru pau-Miu, oo Ue.

⁶⁶ Ipaguruakunemo ponto'ori ka pontimbanga anu mentee, hangano kupe'ala-alao luwuno parenta-Miu.

⁶⁷ Se'eluno napi kupine'uru-uru, da tesaa aku, sine kanandio-andio ongkue me'ini a dandi-Miu.

⁶⁸ Omiu moiko ka moweweu moiko; Ipaguruakunemo luwuno pompakosi-Miu.

⁶⁹ Mia anu mompelangka-langkai sumosa'aiakono pegaupi nee-Ku, sine tompaano aroa aku uminio luwuno parenta-Miu.

⁷⁰ Aroado pudu-pudu kana tetutuwiako taba, sine ongkue ineheakono Songka-Miu.

⁷¹ Lano kupemoikoo nine ongkue pinokongkodei, ka kupepaguruakono luwuno pompakosi-Miu.

⁷² Taura anu pinohawe-Miu masuliopo olino ndi ongkue sekonopo sowuno lempe wulaa ka salaka.

⁷³ Kae-Miumo mokogagi ka weweu aku, Ipowee akumo pompokonto'ori ka kupolio mepaguruakono luwuno parenta-Miu.

⁷⁴ Mia anu doito ndi Omiu kumita aku ka mawongko, hangano ongkue momperorohi a mpau-Miu.

⁷⁵ Kuto'orio, oo Ue, nine luwuno songka-Miu moleo, ka nine tekona Ipokongkodei aku.

⁷⁶ Po'ineeomo pompehohawa-Miu tumarero aku, menunu saru dandi anu pinau-Miu a ntetenaa-Miu.

⁷⁷ Po'ineeomo pompehohawa-Miu ka ihawe ndi ongkue, ka kutuwu, hangano ku'ineheakono Songka-Miu.

⁷⁸ Po'ineeomo mia anu mompelangka-langkai ipinokoko'ii, hangano molengkudo mempopo'oo aku sine aku menootio luwuno parenta-Miu.

⁷⁹ Po'ineeomo mia anu doito ndi Omiu aiwa ndi ongkue, luwuno mia anu tumo'orio luwuno pepopoto'ori-Miu.

⁸⁰ Po'ineeomo aroaku ka itondao luwuno pompakosi-Miu inso i aroa, ka si kupohawe mokoko'ii.

⁸¹ Masusa aroaku monsisikori pongkadudui-Miu, momperorohi aku a mpau-Miu.

⁸² Mataku mooro monsisikori dandi-Miu; kupotae, ”Te'ipiake Komiu tumarero aku?”

⁸³ Maupo kugagi mokari kana kadu-kadu anggoro anu sinompui, luwuno pompakosi-Miu nahi kukolupeo.

⁸⁴ Opia mbo'u tehineno ta tuwu tetenaa-Miu andio? Te'ipia Ihuku ira mia anu lumampui aku?

⁸⁵ Mia mompelangka-langkai mongkekeomo aa tedontaaku, nahi domperioo Songka-Miu.

⁸⁶ Luwuno parenta-Miu pine'ala-ala; Itulungi akumo hangano domelampui aku nahina pu'uno!

⁸⁷ Ilawupo dompokotampula aku inso i wawontolino, sine nahi kubintao luwuno parenta-Miu.

⁸⁸ Iweweu akumo tuwu menunu saru pompehohawa-Miu, ka kupe'ini a mpepopoto'ori anu Iweeakune.

⁸⁹ Ranta nahina tampulaano, oo Ue, pau-Miu moroso i suruga.

⁹⁰ Petenunu-Miu nahi penaa-naa mapa'api-api inule; Ipontadeomo tolino ranta ka ipentade moroso.

⁹¹ Montonda luwuno songka-Miu, luwuno mentade moroso hawe oleo andio, hangano luwuno atuu onaemo tetenaa-Miu.

⁹² Ande-andeno Songka-Miu komba gagi anu ineheku, mate akumo a laro marasaiku.

⁹³ Ranta nahina tampulaano nahi aku kumolupeo luwuno parenta-Miu, hangano saru atuu Iweweu aku tuwu.

⁹⁴ Ongkue andio mia-Miu, Ikadudui akumo, hangano ku'ungkeo luwuno parenta-Miu.

⁹⁵ Mia mosa'o gauno mo'ungke akala mepate aku; sine kongkoku mekokoongakono luwuno pepopoto'ori-Miu.

⁹⁶ Kukitao nine luwuno anu soompo ntu'u hinao tidano, sine parenta-Miu malua ntu'u.

⁹⁷ Kukekewoio ntu'u Songka-Miu! Kupenootio hawe sumoo oleo.

⁹⁸ Parenta-Miu weweu aku lalu pande mosongka sekono luwuno iwaliku, hangano onaemo anu kumongkomi aku ranta nahina tampulaano.

⁹⁹ Molinoopo pinewowoloku sekonopo luwuno anu paguru aku, hangano luwuno pepopoto'ori-Miu anu kupenootio.

¹⁰⁰ Ongkue lalu mokonto'orio sekonopo luwuno mia mota'u, hangano ku'inio luwuno parenta-Miu.

¹⁰¹ Ku'ontoo karuku inso a luwuno pesalaa anu mosa'o, ka kupe'ini a mpau-Miu.

¹⁰² Nahi kupansia inso a luwuno songka-Miu, hangano Omiumo anu paguru aku.

¹⁰³ Mo'ahi ntu'u dandi-Miu atuu a eloku, mo'ahiopo sekono siu hoani a ngangaku.

¹⁰⁴ Inso a luwuno parenta-Miu kupohawe ponto'ori, onaemo pu'uno ku'o'aliaakono luwuno pesalaa anu nahi mentee.

¹⁰⁵ Pau-Miu atuu huluno karuku ka mewineno pesalaaku.

¹⁰⁶ Mesumpa akumo ka aku umihiio, aku me'ini a luwuno songka-Miu anu moleo.

¹⁰⁷ Tedoa aku tepokonsii, oo Ue, Iweweu akumo tuwu menunu saru pau-Miu.

¹⁰⁸ Ipemoikoomo, oo Ue, po'unde-unde pinesombaakoku, ka Ipaguruakunemo luwuno songka-Miu.

¹⁰⁹ Tuwuku wela pino'aroako masolaa, sine Songka-Miu nahi kukolupeo.

¹¹⁰ Mia mosa'o gauno monta'oomo oho ta mopo'oo aku, sine nahi kupansia inso a luwuno parenta-Miu.

¹¹¹ Luwuno pepopoto'ori-Miu onaemo tia pusakaku ranta nahina tampulaano, hangano luwuno atuu gagi pokomawongkono aroaku.

¹¹² Kupo'asaomo aroaku aku weweuo luwuno pompakosi-Miu, ranta nahina tampulaano, ranta pokotompaano tempo.

¹¹³ Mia anu mesampa aroano ku'o'aliaakono, sine Songka-Miu kukekewoio.

¹¹⁴ Omiumo pewuniaku ka kantaku; kuperorohio pau-Miu.

¹¹⁵ Ime'olaimo inso ndi ongkue, hei luwuno anu mpoweweu mosa'o; aku uminio luwuno parenta-Do Ue Alaku.

¹¹⁶ Ipokoroso akumo menunu saru dandi-Miu, ka kutuwu, si po'inee aku ranta mokoko'ii a laro pomperorohiku.

¹¹⁷ Ipokowali akumo, ka kutekadudui ka mekokoongakono mpiha luwuno pompakosi-Miu.

¹¹⁸ Luwuno mia anu pansia inso a luwuno pompakosi-Miu nahi Itarima ira, hangano nahina tuduno pe'akalado.

¹¹⁹ Luwuno mia mosa'o gauno Itadi ira kana ta'i labu; onaemo pu'uno ka kukekewoio luwuno pompakosi-Miu.

¹²⁰ Koroiku mondidi-ndidi doitoa-Komiu, kudoitoakono luwuno songka-Miu.

¹²¹ Moweweu akumo menunu saru songka ka moleoa; si peweengakune ndi ondae anu pompokonsii!

¹²² Gagimo pe'inia a tetenaa-Miu a moikoa, ka si pokonsii aku mia mompelangka-langkai.

¹²³ Mataku mooro monsisikori pongkadudui-Miu ka dandi-Miu anu moleo.

¹²⁴ Iweweuomo tetenaa-Miu menunu saru pompehohawa-Miu, ka Ipaguruakunemo luwuno pompakosi-Miu.

¹²⁵ Ongkue andio tetenaa-Miu, Ipowee akumo ponto'ori, ka kupokonto'orio luwuno pompakosi-Miu.

¹²⁶ Ndiomo tempono Dopelelu i Ue, hangano Songka-Miu domelimpaiomo luwuno mia.

¹²⁷ Onaemo pu'uno ka kukekewoio luwuno parenta-Miu laluaopo sekono wulaa maupo wulaa mpena.

¹²⁸ Onaemo pu'uno ka kutuwu moleo tumondao luwuno parenta-Miu; pesalaa nahi mentee ku'o'aliaakono.

¹²⁹ Kinohali-haliakoomo luwuno pepopoto'ori-Miu, onaemo pu'uno, ka ku'inio.

¹³⁰ Luwuno pau-Miu anu pinosaba mompokomewine, moweeako ira ponto'ori a mia anu napi hina pinembasaino.

¹³¹ Konganga-nganga aku a laro ntekewoi, kumekewoio luwuno parenta-Miu.

¹³² Ipewolilimo ndi ongkue ka Ipehohawa akumo, montonda moleo-Miu a luwuno mia anu kumekewoio nee-Miu.

¹³³ Ipokorosoomo pelempaku menunu saru dandi-Miu, ka si pabawai aku maupo hapa anu mosa'o.

¹³⁴ Ipotola akumo inso a pompokonsiino mia, ka kupe'ini a luwuno parenta-Miu.

¹³⁵ Iwantahiakonomo rupa-Miu tetenaa-Miu, ka Ipaguruakunemo luwuno pompakosi-Miu.

¹³⁶ Uwoi mataku waa kana waaano uwoi, hangano mia nahi pe'ini a Songka-Miu.

¹³⁷ Omiu moleo, oo Ue, ka luwuno songka-Miu mentee.

¹³⁸ Luwuno pepopoto'ori-Miu Ipohaweomo montonda moleoa ka butu a laro luwuno petenunu.

¹³⁹ Tekuda anu mongkokongiri mokopingko aku, hangano luwuno anu umewai aku mengkolupeo luwuno pau-Miu.

¹⁴⁰ Dandi-Miu tedoa moroso, ka tetenaa-Miu kumekewoio.

¹⁴¹ Ongkue andio kodei ka mongkoko'undu, sine luwuno parenta-Miu nahi kukolupeo.

¹⁴² Moleo-Miu nahi bali ranta nahina tampulaano, ka Songka-Miu mentee.

¹⁴³ I'alu aku masusaa ka ma'isoa, sine luwuno parenta-Miu gagi tedoa ineheku.

¹⁴⁴ Luwuno pepopoto'ori-Miu moleo ranta nahina tampulaano, Iweweu akumo mokonto'orio ka kutuwu.

¹⁴⁵ Mebooli aku tompaano aroaku, Isangki akumo, oo Ue! Luwuno pompakosi-Miu aku uminio.

¹⁴⁶ Mebooli aku ndi Omiu, Ikadudui akumo! Aku koa me'ini a luwuno pepopoto'ori-Miu.

¹⁴⁷ Mo'o-mo'oru ntu'u kupewangu ka mebooli mepetulungi; momperorohi aku a mpau-Miu.

¹⁴⁸ Ongkue mekaangako sompo tempo daga wongi ka kupenootio dandi-Miu.

¹⁴⁹ Irongeomo suaraku menunu saru pompehohawa-Miu; Iweweu akumo tuwu menunu saru songka-Miu, oo Ue.

¹⁵⁰ Luwuno mia anu lumampui aku saru tinoo mosa'o me'umpeda, ondae me'olai inso a Songka-Miu.

¹⁵¹ Omiu umpeda, oo Ue, ka luwuno parenta-Miu mentee.

¹⁵² Lano tehineomo kuto'orio luwuno pepopoto'ori-Miu, anu pinakosi-Miu ranta nahina tampulaano.

¹⁵³ Ikitaomo marasaiku ka Ipotola akumo, hangano Songka-Miu nahi kukolupeo.

¹⁵⁴ Ikorahakonomo kara-karaku ka Itolosi akumo, Iweweu akumo tuwu menunu saru dandi-Miu.

¹⁵⁵ Tekaduduia atuu olai inso a luwuno mia mosa'o gauno, hangano nahi dome'ungkeo luwuno pompakosi-Miu.

¹⁵⁶ Langkai ntu'u pompehohawa-Miu, oo Ue, Iweweu akumo tuwu menunu saru luwuno songka-Miu.

¹⁵⁷ Anu mpolampui ka anu umewai aku lano hadio, sine nahi kupansia inso a luwuno pepopoto'ori-Miu.

¹⁵⁸ Kumita ira anu mpohapu pedandia, kumokoburuakono, hangano nahi dompe'ini a dandi-Miu.

¹⁵⁹ Ikitaomo, tedoa kukekewoio luwuno parenta-Miu! Iweweu akumo tuwu menunu saru pompehohawa-Miu, oo Ue.

¹⁶⁰ Anu lalua i larono pau-Miu onaemo menteea ka luwuno songka-Miu anu moleo nahi bali ranta nahina tampulaano.

¹⁶¹ Luwuno anu langkai potorono melampui aku nahina pu'uno, sine butu a mpau-Miu aroaku doito.

¹⁶² Kupo'undeakono dandi-Miu, kana mia anu mohawe hadio pinomuru.

¹⁶³ Ku'o'aliaakono ka kumokoburuakono pegaupi, sine Songka-Miu kukekewoio.

¹⁶⁴ Pepintu asa oleo ku'unde-unde Komiu, hangano luwuno songka-Miu anu moleo.

¹⁶⁵ Tedoa iramo sintuwu manangai mia anu kumekewoio Songka-Miu, nahina watu tetiduado.

¹⁶⁶ Momperorohi aku tekaduduia inso ndi Omiu, oo Ue, ka kuweweuo luwuno parenta-Miu.

¹⁶⁷ Me'ini aku a luwuno pepopoto'ori-Miu, ka tedoa kukekewoio.

¹⁶⁸ Me'ini aku a luwuno parenta-Miu ka luwuno pepopoto'ori-Miu, hangano luwuno tumuwuku nahina tewuni i aro-Miu.

¹⁶⁹ Po'ineeomo pebooliku ka ihawe i aro-Miu, oo Ue; powee akumo ponto'ori menunu saru pau-Miu.

¹⁷⁰ Po'ineeomo po'emaku ka ihawe i Aro-Miu; Ipotola akumo menunu saru dandi-Miu.

¹⁷¹ Po'ineeomo wiwiku ka ipompau po'unde-unde, hangano Ipaguruakunemo luwuno pompakosi-Miu.

¹⁷² Po'ineeomo eloku ka ipenaniako dandi-Miu, hangano luwuno parenta-Miu moleo.

¹⁷³ Po'ineeomo kae-Miu gagi tumulungi aku, hangano kubinikio luwuno parenta-Miu.

¹⁷⁴ Kukekewoio tekaduduia inso ndi Omiu, oo Ue, ka Songka-Miu gagi ineheku ntu'u.

¹⁷⁵ Po'ineeomo ka kutuwu umunde-unde Komiu, ka luwuno songka-Miu tumulungi aku.

¹⁷⁶ Tesaa aku kana bimba anu tetadi, I'ungkeomo tetenaa-Miu andio, hangano luwuno parenta-Miu nahi kukolupeo.