Po'unde-unde 118 - Wunta Mempori

Penani morame-rameakono ponangia 118:1-29

¹ Pontarimakasimo ndi Ondae i Ue, hangano moiko Ira! Menteeano ranta nahina tampulaano pompehohawa-Do.

² Po'ineeomo to Isaraeli dompotae, ”Menteeano ranta nahina tampulaano pompehohawa-Do!”

³ Po'ineeomo sukuno i Haruni dompotae, ”Menteeano ranta nahina tampulaano pompehohawa-Do!”

⁴ Po'ineeomo mia anu doitoako Ira i Ue mpotae, ”Menteeano ranta nahina tampulaano pompehohawa-Do!”

⁵ A laro pompema'iso ongkue mebooli ndi Ondae i Ue. Dosangki akumo i Ue saru moweeakune koloaa.

⁶ Ondae i Ue kumongkomi aku, nahi kudoito. Hapake anu pinolino mia weweuo ndi ongkue?

⁷ Ondae i Ue kumongkomi aku ka tumulungi aku; aku me'uru-uru ira mia anu umo'aliaakune.

⁸ Moikoopo mepekadudui ndi Ondae i Ue sekonopo mompe'ala-ala a mia.

⁹ Moikoopo mepekadudui ndi Ondae i Ue sekonopo mompe'ala-ala a luwuno ulea mokole.

¹⁰ Luwuno tongku mengkadu aku, sine a nee-Do i Ue kupuduo pesapoido.

¹¹ Domengkadu aku, oo mengkadu aku, sine a nee-Do i Ue kupuduo pesapoido.

¹² Domengkadu aku kana hoani, kolanga-langa kana api a laro ewo rui, sine a nee-Do i Ue kupuduo pesapoido.

¹³ Ongkue hinidi ka hinidi ka kutedonta, sine Ondae i Ue tumulungi aku.

¹⁴ Ondae i Ue atuu rosoku ka penani po'unde-undeku; gagi Iramo tekaduduiku.

¹⁵ Suara kokora-kora memawongko ka ponangia teronge a ngkemado mia mentee, ”Kae ngkoana-Do i Ue moroso montulungi,

¹⁶ kae ngkoana-Do i Ue tetande mantande, kae ngkoana-Do i Ue moroso montulungi!”

¹⁷ Nahi aku mate, sine kongko tuwu, ka kututuluo luwuno wineweu-Do i Ue.

¹⁸ Dotunduhi akumo i Ue meroku, sine nahi Dopeweengakune a matea.

¹⁹ Ungkahiakunemo pewowa langkaino menteea, ineheku mewinso i larono, ka montarimakasi ndi Ondae i Ue.

²⁰ Ndiomo pewowa langkai-Do i Ue, mia mentee ta mewinso i larono.

²¹ Montarimakasi aku ndi Omiu, hangano Isangki akumo ka gagiomo tekaduduiku.

²² Watu anu tinadido puu mpowangu gagiomo watu empehino siuno.

²³ Mongkona atuu ka igagi hangano Ondae i Ue, aasa kinohali-haliako a pongkitato.

²⁴ Ndiomo oleo anu pinokogagi-Do i Ue, aiwamo tomengkokora-kora memawongko ka mpo'unde i larono!

²⁵ Oo Ue, Ikadudui kamimo! Oo Ue, Ipowee kamimo manangaia!

²⁶ Rinonsoomo onae anu aiwa a nee-Do i Ue! Kimeronso komiu inso a laro Raha-Do i Ue.

²⁷ Ondaemo i Ue, Ue Ala, Ondae wantahi kita. Tanggoakonomo koloro pesomba oleo langkai atuu a luwuno tanduno meda pontunua pesomba.

²⁸ Omiu Ue Alaku, aku montarimakasi ndi Omiu, Ue Alaku, aku melangkai Komiu.

²⁹ Pontarimakasimo ndi Ondae i Ue, hangano moiko Ira! Menteeano ranta nahina tampulaano pompehohawa-Do.