Po'unde-unde 116 - Wunta Mempori

Montarimakasi hangano tola inso a mponguno matea 116:1-19

¹ Aku mehohawa Ira i Ue, hangano Dorongeo pebooliku ka po'emaku.

² Hangano Dopo'aroo biri-Do ndi ongkue, onaemo pu'uno asa ntinuwuku aku mebooli ndi Ondae.

³ Ohono matea wewesi aku, doitoakono tolinodo mia mate umalu aku, masusa aku ka me'i'isei.

⁴ Sine kupebooliakono mpiha nee-Miu, ”Oo Ue, po'ineeomo ka Ipotola aku!”

⁵ Ondae i Ue atuu mompehohawa ka moleo, Ondae Ue Alato me'aroa.

⁶ Ondae i Ue mekaria ira mia anu nahi dompompelangka-langkai; nahina rosoku, sine Ondae kumadudui aku.

⁷ Walimo pomperodo, hei sumangaku, hangano Ondae i Ue moweweu Iramo moiko ndi omue.

⁸ Oo, Ipotola akumo inso a matea, ka mataku inso a mpowerano uwoi mata, ka dumagaio karuku onaemo ka nahi tetidu.

⁹ Moiko kupelempa i aro-Do i Ue, a witado mia mentuwu.

¹⁰ Kupe'ala-ala Ira mpiha, maupo komotae, ”Ongkue andio tedoa tepokonsii.”

¹¹ A laro bulalingoku kupotae, ”Luwuno mia megaupi.”

¹² Kana'umpe aku sumuloo ndi Ondae i Ue luwuno poweweu-Do anu moiko ndi ongkue?

¹³ Aku tumandeo piala tekaduduia, ka mebooliakono nee-Do i Ue,

¹⁴ aku umowahio pontangaku ndi Ondae i Ue i arodo luwuno bawaa-Do.

¹⁵ Tedoa Dopemobeao i Ue mateno mia anu pinehohawa-Do.

¹⁶ Oo Ue, ongkue andio tetenaa-Miu! Ongkue tetenaa-Miu, anano tetenaa-Miu beine! Ilohuomo luwuno onggoku!

¹⁷ Aku mompesombaako pontarimakasi ndi Omiu, ka aku mebooliakono nee-Do i Ue,

¹⁸ aku umowahio pontangaku ndi Ondae i Ue i arodo luwuno bawaa-Do,

¹⁹ a kintalano Raha-Do i Ue, i tonga-tongamu, hei Yerusale! Haleluya!